Иранските хакери на предизборниот тим на Бајден му испратиле материјал за кампањата на Трамп
Ирански хакери испратиле е-пошта со украден материјал од кампањата на Доналд Трамп до луѓето ангажирани во кампањата за реизбор на тогашниот претседател Џо Бајден, што било дел од наводните пошироки напори на Техеран да влијае на претстојните претседателски избори во САД, објавија американските агенции.
Препорачано
Како дел од оваа акција, хакерите испратиле мејлови до персоналот на тогашниот кандидат на демократите Џо Бајден, нудејќи „украден, необјавен“ материјал од кампањата на Доналд Трамп. Американските власти соопштија дека ниту еден од персоналот на Бајден не одговорил на овие мејлови.
Канцеларијата на директорот на националното разузнавање на САД, ФБИ и Агенцијата за кибербезбедност и инфраструктурна безбедност првично го обвинија официјален Техеран дека се обидува да влијае на претседателските избори во 2024 година, што Иран пак категорички го негираше.
Истите агенции, исто така, ги обвинија Русија и Кина дека „до одреден степен се обидуваат да ги влошат поделбите во американското општество за своја корист“.
Компанијата за социјални медиуми Мета во август соопшти дека група ирански хакери се обиделе да ги нападнат двете претседателски кампањи преку сметките на вработените на апликацијата за пораки ВатсАп.
EPA-EFE/DEMETRIUS FREEMAN / POOL
Според Мета, групата се претставувала како агенти за поддршка на технолошките гиганти како Гугл и Мајкрософт. Компанијата соопшти дека нема докази за загрозени сметки, таа одлучила да ги сподели своите наоди јавно „но со доза на висока претпазливост“.
Шефот на Мајкрософт, Бред Смит, исто така предупреди на напорите за мешање пред изборите за претседател на САД во ноември.
– Најопасниот момент ќе дојде 48 часа пред почетокот на изборите – изјави Смит како дел од сослушувањето во американскиот Сенат, алудирајќи на обидот кој една „руска група“ минатата есен се обиде на сличен начин да се меша во изборите во Словачка.
– Има реални и сериозни закани – додаде тој.
САД излегуваат на гласање на 5 ноември, а веќе и Трамп и демократската кандидатка Камала Харис обвинија дека биле цел на кибернапади во последните недели.
