Иранскиот претседател Масуд Пезешкијан издаде декрет со кој се суспендира соработката меѓу Иран и Меѓународната агенција за атомска енергија (МААЕ), објави Тасним.

„Пезешкијан издаде декрет за суспензија на соработката со МААЕ“, се вели во соопштението.

Агенцијата наведува дека, по израелските и американските напади врз нуклеарните објекти на Иран, пратениците усвоија закон насловен како „Суспендирање на соработката на Исламската Република со Меѓународната агенција за атомска енергија со барање за две итни мерки“.

Еден член од законот наведува дека, „со оглед на кршењето на националниот суверенитет и територијалниот интегритет на Иран од страна на ционистичкиот режим и Соединетите Американски Држави во однос на мирнодопските нуклеарни објекти на земјата и заканата за врвните интереси на Иран, врз основа на член 60 од Виенската конвенција за договори од 1969 година, владата е должна веднаш да ја суспендира сета соработка со Меѓународната агенција за атомска енергија врз основа на Договорот за неширење на нуклеарно оружје (ННР) и неговите заштитни мерки, сè додека не се исполнат одредени услови, вклучително и обезбедување на безбедноста на објектот и научниците“.