Иран сè уште не се обратил до организацијата БРИКС во врска со ескалацијата на конфликтот со Израел, изјави денес заменик-министерот за надворешни работи на Русија, Сергеј Рјабков.

На прашањето дали може да се очекува координиран одговор од БРИКС во врска со нападот на Израел врз Иран, Рјабков рече дека „сè во голема мера зависи од земјата што станала цел на ова грубо кршење на темелите на меѓународното право“, пренесува ТАСС.

„Со оглед на тоа што Иран е земја-членка на БРИКС, иницијативата треба да дојде од Иран. Лично, не сум сигурен дека Иранците сега сакаат да го форматираат ова прашање во БРИКС“, рече Рјабков.

Израелските одбранбени сили (ИДФ) ја започнаа операцијата „Рајз лав“ во четврток вечерта, во која израелските воздухопловни сили нападнаа воени цели и локации на иранската нуклеарна програма за да го спречат Иран да се здобие со нуклеарно оружје.

Иран соопшти дека одговорил на „бруталниот израелски напад“ во операцијата „Вистинско ветување 3“ со испукување десетици ракети кон земјата.