Иранската револуционерна гарда го лансираше првиот воен сателит, објави иранската државна телевизија, додавајќи дека сега тој се наоѓа во орбитата.

– Првиот ирански воен сателит „Ноор“ утрово успешно е лансиран, а постапката се одвиваше во две фази, се вели во соопштението.

Иран последните неколку месеци имаше неколку неуспешни обиди.

Ова лансирање се случува во екот на висока напнатост меѓу Техеран и Вашингтон во однос на иранската нуклеарна и балистичка програма и неколку месеци по ликвидирањето на иранскиот воен командант, Касем Сулејмани, при американски напад во Багдад.

– Овој чекор ќе означи голем успех и претставува нов развој во вселенскиот домен за Иран, се вели во телевизиското соопштение.

Извештајот за успешно спроведеното лансирање следува по два месеци од претходниот неуспешен обид со набљудувачкиот сателит Зафар 9.

На тој обид реагираше Франција, која ја осуди операцијата, бидејќи како што оцени многу потсетува на лансирање балистичка технологија слична на оние кои се користат за носење нуклеарно оружје.

Париз тогаш го повика Иран да ги почитува своите меѓународни обврски.

Техеран тврди дека неговиот вселенски програм е мировен.