Во интервјуто за „Слободен печат“ зборуваме со оперската и поп-пејачка Полина Тасева. За љубовта, музиката, модата, инспирацијата и за Скопје низ разговорот со Тасева…

Со оглед дека пролетта за многумина е најубавото годишно време, колку овој период од годината буди убави чувства и емоции? Влијае ли врз расположението и инспирацијата?

– Бидејќи сум родена напролет, во април, отсекогаш ова годишно време ми било омилено. Дури ми се случува секоја година, на почетокот на пролетта, особено кога шетам во вечерните часови и се чувствува благиот здив на затоплување, да си кажам: Има ли поубаво нешто од пролетта? Особено оваа пролет се чувствувам пријатно, исполнето и инспирирано. Сакам моето расположение да го водам позитивно – и за себе и за моите најблиски, бидејќи размената на чиста енергија секогаш носи ведрина и инспирација.

Твоето појавување донесе свежина на македонската музичка сцена. Од каде љубовта кон операта? Знам дека потекнуваш од музичко семејство – колку тоа влијаеше врз твојата музичка определба?

– Пред пет години се појавив во јавноста со авторска музика. Претходно, како дете, често бев присутна на телевизија во детски емисии како балерина, бидејќи шест години бев член на балетското студио „ТУТУ“. Кратко по првата песна се претставив и со втора на фестивалот „Макфест“ во Штип, каде што во 2020 година ја освоив наградата за најдобар дебитант. Оттогаш, па сè до моето последно појавување на „Макфест 2024“, каде што имав забележителен настап со моќна песна и впечатливи костими, продолжив со сè повеќе музички ангажмани. Операта не ја изоставувам од мојата приказна, затоа што љубовта кон пеењето започна преку изучувањето на вокалната оперска техника. Тоа е мојот темел – таму се чувствувам своја и комотна кога станува збор за изведба. Упорноста, истрајноста и едукацијата што ги добив од моите родители од најрана возраст, разбудија кај мене голема желба – кога ќе пораснам, да бидам сценски изведувач кој и игра и пее. Од шестгодишна возраст до денес, тоа чувство не се променило.

Како изгледа еден ден на една оперска пејачка?

– Во моментов сум посветена на себе и на своето расцутување, исто како што пролетта буди и оживува. Денот ми започнува релаксирано и смирено – со подготовка на напивка, појадок и првото кафе. Потоа ги разгледувам обврските што ме очекуваат во наредниот период. Напладне го „будам“ гласот со вежби за распевање и работам на материјал за тековните ангажмани. Исто така, работам на идни проекти, вложувам во себе и во својата дисциплина, откривам нови нешта што ми носат напредок. Посетувам теретана и уживам во готвење вкусни оброци. Во текот на денот сакам да се дружам со најблиските – тие се моја размена на позитивна енергија и силна поддршка.

Дали Македонците се добра публика за опера?

– Со текот на годините, Македонците станаа одлична публика. Луѓето веќе ги познаваат оперите и го следат репертоарот во Оперската куќа. Сметам дека со добар маркетинг и вложување во културолошка едукација, работите би биле уште подобри. Важно е што има публика, затоа што секој изведувач се радува на полна сала, громогласни аплаузи и насмеани лица. Ние живееме за тие моменти.

Покрај операта, пееш и поп-музика. Каде е поголемиот предизвик?

– Операта и поп-музиката се два различни света, иако ги поврзува пеењето. Во мојот случај, и со оглед на времето во кое живееме, работите не зависеле секогаш само од мене. За мојата професија како оперски уметник, многу зависи од тоа дали општеството е подготвено да им даде поддршка на пејачите што треба да бидат таму каде што припаѓаат. Но, нештата не секогаш се одвиваат според очекувањата. Затоа понекогаш мораме да скршнеме од патот. Моето „скршнување“ кон поп-музиката ми донесе нови откритија и предизвици, кои ми покажаа дека сум забележителна и поразлична како артист. Тоа ми помогна во личниот развој, и сум навистина горда на тоа што денес го работам. Останува само да освојувам нови предизвици, па ќе ми кажете вие каде ме чувствувате повеќе своја.

Како ја одржуваш убавината и остануваш во врвна форма?

– Немам некои посебни методи. До пред една година користев обичен крем. Сега, со помош на пријателите и социјалните мрежи, добив подобри информации за козметика и нега. Користам неколку проверени препарати што ѝ одговараат на мојата кожа. Би препорачала редовна хидратација, добар пилинг и маски – сè што помага за регенерација и свежина. Редовно одам во теретана, бидејќи тоа е голема дисциплина за моето ментално здравје и за одржување здраво тело. А и генетиката си го прави своето.

Ја сакаш ли модата и каков е твојот стил на облекување?

– Секако, модата и стилот се дел од моето секојдневие. Без да изгледам добро, пред сè, за себе – не излегувам од дома. Внимавам на сите детали – комбинации, коса, накит… Мојот стил е она што ми стои убаво, што е практично, стилизирано, со вкус и впечатливо.

Љубовта како вечна тема… Како стоиш на тоа поле?

– Тоа поле знае да биде променливо сè додека не дојде до моментот на ветување пред Бог. Кај мене сè уште не се случил тој чин, но се надевам дека во иднина ќе дојде до заокружување на љубовта со среќен крај. Љубовта е главна водилка во животот и не треба да се плашиме да ја даваме – само треба да научиме како да ја негуваме вистински, без страв, срам и его.

Збор два за Скопје – како го поминуваш времето, што ти се допаѓа, а што најмногу ти пречи во градот?

– Скопје како град ми е убав. Тој не е виновен за сите промени што ги претрпе. Сакам да живеам тука, но во една посредена, поорганизирана верзија. Се надевам дека ќе го доживееме тоа, затоа што Скопје заслужува да изгледа убаво – како вистинска метропола и гордост на Македонија. Најмногу ми пречи хаосот во сообраќајот и нервозата кај возачите. Искрено, не знам дали тоа брзо ќе се смени, затоа што, како и за сè во животот, промената мора да почне од нашата ментална свест. Само така се градат реформи и настануваат вистински промени – и кај луѓето и во општеството.