Ива Матиќ е млада и талентирана манекенка што успешно ги балансира школските обврски и модата. Матиќ сѐ повеќе е ангажирана во спотови, реклами кампањи, ревии. Пред да започне да се занимава со мода таа активно тренираше фудбал, спорт заради кој и денес е горда на себе.

Од фудбалскиот терен до фото-сетовите, приказната на Ива во интервјуто за „Слободен печат“.

Ива, пред сè, како започна твојата приказна врзана за работата како модел и како дојде до соработката со „Мак Моделс“?

– Од мошне мала возраст се занимавам со уметност и спорт, а најмногу од сè уживав во сценскиот настап. Следејќи ги „Мак Моделс“ на социјалните мрежи, ми се јави желба да бидам дел од нивниот тим. Разговарав со моите родители и им ја објаснив мојата решеност да се занимавам со моделинг. Иако веднаш не ми одобрија, сепак, успеав да им ја доловам мојата голема желба, при што ме сфатија и се согласија. Се пријавив на кастинг во агенцијата и така започна сè.

Дел си од реклами, кампањи и музички спотови, ревии… Колкав е предизвикот?

– Иако сум на почеток на оваа приказна, самото тоа што имам можност да бидам дел од моден проект е предизвик само по себе. Благодарна сум што имам можност да бидам дел од агенција која нуди голем број проекти што сами по себе предизвикуваат восхит кај мене.

Како изгледа еден ден кога се работи на сет?

– Во кратки црти: забавно, спонтано и исполнувачки.

Со оглед на тоа дека ќе бидеш трета година во гимназија, како успеваш да ги усогласиш обврските со училиштето и работата како модел?

– Учењето во гимназија има свои предизвици, но со добра организација успевам да го постигнам посакуваното и во двете полиња.

Интересна е твојата приказна дека пред ова активно тренираше фудбал. Како би го опишала тој период од животот?

– Фудбалот зазема голем период во мојот живот. Од мала возраст бев на терен, бев дел од собири за У-15, настапував во младинска лига како капитен и бев дел од сениорски тимови.

Што те привлече во фудбалот и дали сè уште играш понекогаш? Ако не играш, дали редовно следиш фудбалски натпревари и за кого навиваш?

– Мојот натпреварувачки дух беше пресуден за моите фудбалски почетоци. Отсекогаш сум имала голема желба за победа, што и се бара во фудбалот. До неодамна бев присутна на фудбалскиот терен, а сè уште ги следам актуелните фудбалски натпревари.

Дали спортот ти помогна на некој начин во твојата сегашна кариера, на пример, во дисциплината, издржливоста или самодовербата?

– Еден од клучните фактори во градењето на мојот карактер секако е спортот. Дисциплината, издржливоста и самодовербата се важни особини. Нив ги стекнав со спортот и сè уште ми помагаат.

Ајде малку приватно… Како би го опишала својот личен стил во облекување надвор од професионалните сетови?

– Секогаш гледам да сум максимално средена и дотерана, а притоа почитувам едноставни комбинации што одговараат на моето тело и на мојот карактер.

Дали имаш некој моден пример или личност што те инспирира?

– Конкретен пример немам, иако сакам да следам сè што се случува наоколу во модата.

Каде се гледаш за пет години – во модата, спортот, можеби нешто сосема различно?

– Сакам да продолжам со модата и да се надградувам, а воедно да го продолжам моето образование на највисоко ниво.

За крај, што те прави среќна, надвор од камерата и сцената?

– Ме радуваат спонтани патувања, стекнување нови пријателства, гледање насмевки на лица и убави моменти со семејството.