Новогодишните и божиќните празници, иако се зад нас, сепак, беа доволна причина за разговор со сопругата на претседателот Стево Пендаровски, Елизабета Ѓоргиевска.

Со првата дама секогаш е задоволство да се прави муабет, а новогодишната магија која полека одминува, донесе многу теми. Како се подготвуваат за Божиќ, како го украсуваат домот, помага ли претседателот во кујната, буди ли зимата сеќавања за детството и уште многу други приказни раскажа Ѓоргиевска во ексклузивното интервју за „Слободен печат“.

По што ќе ја паметите 2023 година и имате ли некоја желба која не стасавте да ја напишете во писмото до Дедо Мраз?

– Минатата, 2023-тата, по многу нешта ќе остане тешка година за сите нас. Се случуваа убави, но и лоши настани. Ме исполнуваа сите активности, хуманитарни акции, проекти и кампањи кои искрено ја добија мојата поддршка, а кои се однесуваа на децата, на ранливите категории граѓани и маргинализирани групи, на рамноправноста на жените, подобрување на здравствените услуги за лицата со ретки болести, подобрување на квалитетот на живот и инклузија на децата со атипичен развој и многу други иницијативи. Единствената желба во новата година е да има многу здравје, среќа и безброј радости за сите нас и во 2024-та да имаме поспокоен, поубав и посреќен живот.

Како ја прославивте Нова година?

– Новата година ја дочекавме во кругот на најблиските. Во оваа прилика, би сакала на сите наши граѓани да им посакам да имаат година полна здравје, семејна хармонија, спокој во душата и бериќет.

Уживавте ли во украсувањето на домот? Новогодишната магија која полека одминува, Ве врати ли во детството, во некои побезгрижни времиња?

– Новогодишните празници секогаш имаат посебна топлина, бидејќи е најубаво кога си во кругот на семејството, со најблиските. Споделувањето на заеднички мигови уште од детството ми било многу значајно. Украсувањето на домот ми бил посебен чин, при што заедно поминувавме убаво и интересно време и бевме понесени од посебната магична атмосфера, подготвувајќи се за претстојната новогодишна ноќ. Имам убави спомени од детството, а се разбира дека спомените поврзани со новогодишните празници ги имам негувано и со мојот сопруг и син, и секогаш гледам колку што е можно повеќе време да поминеме заедно, особено во овој период од годината.

Како ги паметите зимите во Скопје, кога сѐ беше поинаку, со многу снег и почист воздух…?

– Како и сите деца, и јас се радував на снегот, посебно на детската игра со санки, правење снешковци речиси во секој двор. Порано многу нешта беа различни, почесто се одеше на семејни прослави, слави, по гости, сега сè помалку има време за такви активности. Сега, пак, имаме други начини да ја одржиме блискоста со пријателите и роднините. Секое време си носи свои убави спомени, но треба и да се фокусираме да имаме убава сегашност за да имаме и убава иднина.

Што има на Вашата трпеза за празниците?

– На нашата трпеза го има тоа што веројатно и во секој просечен дом – храна којашто вообичаено се подготвува во овој период од годината, како што се сармата, кифличките, салати, колачи. За Бадник традиционално имаме посна трпеза со печена тиква, риба, гравче, посни колачи, суво овошје. Љубител сум на готвењето, па секогаш кога имам слободно време се обидувам да подготвам нови рецепти со цел да внесам нешто поинакво што ќе им се допадне на домашните.

Ви помага ли претседателот околу подготовките во домот, во кујната, на пример?

– Вообичаено јас сакам да ја подготвувам храната, но сопругот и синот секогаш се вклучуваат со помош зависи од тоа колку обврски имаме. Поради сегашната функција на сопругот, тој помалку може да се вклучи и во традиционалното украсување, пазарење и други активности пред празниците, но секогаш кога сме дома за празниците помагаат заедно со синот Огнен. Ако готвењето е претежно моја обврска, тие помагаат со местење и сервирање на масата, раскревање и заедничко средување на кујната.

Има ли некој рецепт кој со мерак го правите и поради кој цела фамилија едвај чека да го сервирате на масата?

– Има повеќе работи кои сакам да ги зготвам, но едно нешто што посебно сакам да приготвувам се колачите кои ги печам и декорирам и за празници и за секоја поголема прилика. Обично сакам и тоа што ќе го зготвам да го споделувам со други, па често знам и да однесам некаде да подарам или да поканам гости. На пример, во време на пандемијата со ковид-19, знаев со Стево или со Огнен да однесам од колачињата кои ги правев на дежурниот медицински персонал кои за време на празниците, наместо со своите семејства да бидат дома, беа на работа.

Како изгледа во Вашиот дом за Божиќ и Бадник? Успевате ли без нервоза да направите сѐ во кујната, како и секоја жена?

– Бадник и Божиќ се периоди кога сите сме дома заедно и можеме да поминеме квалитетно време заедно. Вечерта седнуваме на бадникова вечера. Согласно нашите стари македонски традиции, го месам лепчето со паричка (како што правеа баба ми и мајка ми, подготвувам пресна погача), а бидејќи трпезата е посна, вообичаено подготвуваме риба, гравче, посни сарми и посни колачи.
Божиќ, пак, е празник кој семејно нè сплотува и без исклучок го поминуваме во кругот на семејството, најчесто во домашна атмосфера. Бидејќи, пред сè, ме исполнува и ми претставува задоволство, секогаш лично се ангажирам околу сите подготовки на божиќната трпеза. Од храната до амбиентот, се трудам сè да биде вкусно, но и декоративно и достоинствено. Така што, во пресрет на Бадник и Божиќ, и јас и моето семејство уживаме во секој дел од подготовките.

За „Ретвитни оброк“ месите зелник со жените низ малите градови и села, правите слатки… Вашите роденденски прослави се од хуманитарен карактер… да не набројуваме сѐ. Какво е Вашето чувство по секоја средба со сите овие луѓе?

– Кон сите активности што ги набројавте секогаш пристапувам со особено внимание, грижа и посветеност кон ранливите групи и социјално загрозените граѓани. Се трудам да помогнам секаде каде што можам, дури некогаш и онаму каде што не можам. Емотивно ги доживувам сите тие средби кои во зависност од поводите се различни. Секогаш сум отворена да се вклучам во иницијативи преку кои може да им се помогне на сограѓаните од ранливи категории, како што се социјално загрозени граѓани, лица со попреченост, лицата со ретки болести или, пак, да се вклучам во кампањите од јавен интерес со кои се промовира грижа за здравјето, се укажува на опасноста од одредени малигни заболувања или кампањи за родово базираното насилство. Иако некогаш изгледа дека малку се прави со една активност, сепак, мислам дека секој од нас, ако се посвети на долг рок, може многу да постигне. Со едно мало дело секој ден заеднички да направиме многу за сите.

Неодамна, на гости во претседателскиот кабинет беа децата со попреченост. Успевате ли да им измамите насмевка и задоволство? Како тие реагираа?

– Заедно со сопругот се трудиме за децата со попреченост да посветиме особено внимание за време на празниците. Затоа, речиси секоја година каниме деца и млади со попреченост да дојдат во Кабинетот, заедно китиме елки, подготвуваме некоја забавна активност или едноставно се дружиме. И тоа го практикуваме не само за новогодишните празници, туку и во многу други прилики. Секогаш се многу емотивни тие средби, кога ќе ги видите нивните искрени насмевки, полни со љубов и знаете дека некому сте му го разубавиле денот, во позитивна и пријатна атмосфера, исполнета со среќа и радости.

Откако објавивте фотографии дека бевте во нашата најстара фабрика за чоколади „Европа“, не можам, а да не прашам – дали сте и Вие од оние возрасни кои се радуваат на пакетчињата повеќе од децата?

– Неколку години во пресрет на Нова година ја посетуваме фабриката „Европа“. И годинава, благодарејќи на нивната висока општествена одговорност и во соработка со Црвениот крст, имавме весело празнично дружење со децата, кои имаа можност одблиску да го видат и процесот на производство на слатките производи. Имавме соработка и со компанијата „Макпрогрес“ од Виница, која, исто така, се вклучи, со тоа што беше домаќин на деца од виничкиот регион, како и при посетата што ја имав на Универзитетската клиника за детски болести и Клиниката за белодробни заболувања кај децата „Козле“.

Но, како стоматолог и голем поборник за здрава исхрана и за орално здравје, секогаш ги советувам децата умерено да јадат слатки работи, и што е уште поважно, редовно и правилно да ги мијат забите и да посетуваат стоматолог, затоа што доброто орално здравје е клучот за понатамошното општо здравје.

За крај, дали можете да издвоите барем една Нова година која секогаш ќе ја паметите?

– Навистина има повеќе одбележувања за кои имам убави спомени, но можеби една што ќе ја паметам е кога првпат дома прославивме Нова година со Огнен, како мало бебе, бидејќи навистина огромна радост е кога ќе имате еден нов, најмногу сакан член во семејството, кој ви го разубавува не само прославувањето на новогодишните и божиќните празници, туку и животот секојдневно.