Моментно најдобриот македонски атлетичар Дарио Ивановски (23) неодамна постави нов национален рекорд на 1.500 метри во сала на митинг во Белград. Тој ја истрча патеката за 3:44,98 минути, а тој резултат вреден 1.088 бодови, е еден од највредните во историјата на македонската атлетика, јавуваат од Атлетската федерација на Македонија. Тоа е исто така најдобриот резултат во кариерата на Дарио. Со него Дарио оствари норма за учество на Европското првенство во сала, во Торун, Полска (5-7 март).

Со Ивановски разговаравме за претстојниот настап на ЕП, плановите за годинава и третманот што тој и другите наши атлетичари го имаат во Македонија.
 Која ќе биде вашата цел на ЕП во Полска, во смисла на резултат?
– Мојот настап на европското првенство во Торун, Полска ќе биде да се даде најдоброто од себе.Трките на овие првенства кога се стартува со полуфинале значи многу калкулантски пристап на главните фаворити за да не се потрошат пред самото финале. Јас имав такво лошо искуство на ЕП во Берлин 2018 година и затоа овојпат ќе ја трчам мојата трка на максимум без никакви калкулации.Тоа значи уште еден обид за нов национален рекорд со кој ќе ја „заверам“ оваа за мене најуспешна сезона во кариерата во сала.

Настап на ЛОИ Токио. Дали е тоа амбиција број еден за вас годинава? Во план ли е бркање норма за настап на ЛОИ или ќе одите на тоа да настапите со вајлд-карта?
– Секако дека сон за секој успешен спортист е настап на летните олимписки игри. За да настапам ова лето на ЛОИ Токио ќе морам да го задржам фокусот и врвната форма, но и да го задржам статусот на атлетичар со најмоќен резултат оваа сезона што во моментов е виза за вајлд карта.Секако дека остварувањето на нормата за олимпијадата ми е уште една цел која заедно со тренерот верувам дека можам да ја остварам. Моментно на отворено имам резултат околу 3:40 до 3:41, а блиску сум до нормата околу 5 секунди. Со професионален пристап, подршка и врвни подготовки можам опасно да се приближам до поставената норма и верувам дека можам да ја остварам.
Вашиот тренер Игор Јакимовски најавува борба за за нашите репрезентативци да го добијат заслужениот статус, почит и соодветно наградување рамноправно со останатите заслужни спортисти. Што конкретно значи тоа?
– Мојот тренер е потполно во право. Тој е веќе три децении како активен атлетичар и шест години во тренерските води. Многупати заедно сме констатирале дека состојбите во кралицата на спортовите никако да тргнат во насока како што тоа е во Европа и светот. Каде и да сме настапувале низ светот, сме се чуствувале како спортисти од највисок ранг и почитувани на највисоко ниво. Кај нас тоа не е така и ние сме на маргините во нашето опшество.Тој е голем борец за правдата во спортот. Овојпат ми вети дека ќе ја истера правдата до крај за да го добиеме заслужениот статус како и останатите заслужни спортисти во Македонија.Цврство верувам дека сите заедно може да се избориме за тој статус и атлетиката да биде тоа што е насекаде во светот.

Се надевам на подобри времиња

Постигнување резултати како вашите бара постојана посветеност и професионалност. Колку ова општество ви возвраќа за целиот труд и за потрошеното време?
– Јас веќе шест години комплетно се посветив на атлетиката и дадов многу лична жртва за да успеам во мојата спортска мисија.За жал имам мала и недоволна поддршка во однос на атлетичарите од Балканот кои ги имаат моите резултати и со кои тренирам заедно на подготовки.Верувам дека доколку ја имам поддршката како што ја имаат тие од нивните држави, ќе имам за 10 отсто подобри резултати.Се уште сум оптимист и се надевам дека ќе дојдат подобри времиња.