Барбара Ракичевиќ е млада и надежна пејачка, која допрва го гради своето име на музичката естрада. Многумина ја знаат како ќерка на некогашната водителка Мелита Ракичевиќ. Сепак, Барбара вели дека иако не е лесно да се биде дете на познати родители, нејзиниот музички пат ќе ѝ го донесе успехот.

Во пресрет на новогодишните празници, дали веќе имаш агенда со настапи и каде за новогодишната ноќ?

– Новогодишните празници искрено за мене се симбол за домашна фамилијарна атмосфера, но секако мојата професија не се совпаѓа со тоа. Целиот овој месец и следниот имам настапи со мојот бенд „Ноу енд“ низ цела Македонија, но новогодишната ноќ сепак ќе ја поминам во поинтимна атмосфера.

Те фати ли веќе предновогодишната магија, го украси ли домот и има ли некоја Нова година што засекогаш ќе ја паметиш?

– Кај мене украсувањето оди потрадиционално и е околу Св. Никола, но годинава од толку убави слики што ги гледам, решив и јас да подранам, така што оваа недела ќе блесне и во мојот дом. Секогаш избирам новогодишни бои и не поминувам без црвената. Го обожавам украсувањето, некако ме исполнува и ме полни со убава енергија.

Кога сме кај музика, со каков репертоар настапуваш и како е на твоите настапи?

– Сега-засега сум презадоволна од тоа како ме прифаќа публиката, токму бидејќи сум на почетокот од музичката кариера, секогаш добивам повратна енергија, позитивна, а тоа е најважно. Репертоарот е со забавна музика – поп, домашна, балканска, па и странски хитови, нормално дека сè зависи од локалот каде што пееме.

Од каде љубовта кон музиката и кога откри дека имаш талент?

– Многу природно и непланирано, бев само едно дете што многу сака да пее во автомобил… Понатаму со самото учење да свирам на клавир, пеењето и љубовта кон музиката само се зголемуваше. И еве ме, денес сум на музичкиот пат за кој сонував.

Со оглед на тоа дека и твојата мајка е јавна личност, колку е тешко да излезеш од нејзината сенка?

– Да се биде дете на познати родители има свои добри и лоши страни, но не би променила ништо. Сè уште сум млада и допрва доаѓа моето време да се покажам и докажам, а и луѓето да ме запознаат.

Колку сте блиски и кои совети најчесто ти ги дава?

– Секогаш ме советува многу да работам на себе и секогаш да го дадам својот максимум, да бидам своја и да успеам тоа да го претставам пред луѓето.

Те погодуваат ли некогаш невкусните коментари на социјалните мрежи?

– Искрено, не ме погодуваат, затоа што од многу мала сум имала контакт со тој свет, па веќе сум отрпната на сѐ. Тргнувам од себе и тоа дека никогаш ништо такво не би напишала за никого, па ми е јасно дека тие луѓе што коментираат сешто, се само многу несреќни, за жал.

Не е тајна дека твоите родители иако разделени се во добри односи. Како ти се носиш со оваа ситуација?

– За мене тоа е најнормално. Од почетокот на нивната разделба, немаше никакви рестрикции и сè функционираше нормално. Јас сама одлучував и се гледав еднакво со двајцата. Сега веќе кога пораснав, функционираме посебно и тоа е супер.

Секогаш си убаво дотерана и средена, колку време минуваш пред огледало?

– Многу сакам дотерување и шминкање, тоа е моето време за себе и гледам да го уживам во потполност. Во суштина не се шминкам многу, повеќе од 20 минути не се задржувам. А, за облеката со оглед на тоа што секојдневно сум најмногу во лежерен стил, секогаш се дотерувам брзо, избирам едноставна облека со убави детали.

Што те прави среќна, а што те вади од такт?

Среќна ме прави времето поминато со најблиските, мојот партнер, моите другарки и во суштина малите секојдневни нешта. Од такт најмногу ме вадат луѓе што секогаш имаат коментар и се мешаат каде што не треба. Не сакам негативна енергија и лоши луѓе.

Каква желба посака за следната година?

Во следната година сакам да работам повеќе на себе и на својата музика, а луѓето како и мојата публика да ме запознаат подобро. Така што, се надевам на нешто ново и убаво од мене.