Животот на Армине Пилојан Вртеска започнува далеку од Македонија, во Ерменија, каде што била професорка, преведувачка и љубителка на уметноста. Сепак, љубовта ја носи во нова земја, каде што таа денес ја создава својата приказна, испреплетена со две различни култури. Како сопственичка на локалот „Мелти“, таа не само што нуди уникатни десерти, туку и создава простор каде што се преплетуваат вкусовите и традициите.

Во разговор за „Слободен печат“, таа зборува за својот пат од лингвистиката до гастрономијата, за предизвиците како жена претприемач во Македонија и за значењето на 8 Март како симбол на женската борба.

Армине, Вашата приказна почнува далеку од овде – во Ерменија. Како изгледаше животот таму и што Ве донесе во Македонија? Како се променија Вашите соништа и планови?

– Мојот живот во Ерменија беше исполнет со патувања, дружби, уметност и работа. Бев професорка по англиски на Универзитетот во Ереван, преведував книги, работев со многу писатели од ерменската дијаспора во Америка, и всушност преку работата се запознав со сопругот, кој во тоа време беше службено дојден во мојот град Армавир во Ерменија. Моите соништа никогаш не се променија, јас сѐ уште се стремам да креирам нешто што вчера го немало, сѐ уште сакам креативност, уживам во уметноста, но сега го имам мојот сопруг и моите деца кои ме поддржуваат во моите соништа и желби кои сега ги исполнувам преку „Мелти“.

Во нова земја, нов јазик, нова култура – што беше најголемиот предизвик за Вас како жена, како сопруга, како мајка? Што Ве правеше посилна во тие моменти?

– Јас најпрвин започнав со учење на јазикот. И сметам дека е најважен чекор за некој кој сака да се интегрира во заедницата. Македонскиот јазик за мене не беше тежок, со тоа што знам руски, но без разлика на тоа, брзо го совладав поради тоа што имав голема желба да го научам. Откога го научив јазикот, животот тука стана многу полесен, а како резултат на тоа се родија многу долгогодишни пријателства, комуникацијата се олесни и Македонија сега ја чувствувам како свој дом. Секако дека имало предизвици и денови кога преовладуваа мислите за моите родители, мојот брат и мојот роден град, но како што поминуваа годините и како што се олесни комуникацијата преку интернетот, далечината се намали. Во тие моменти се чувствував силна преку мојата фамилија, преку уметноста и преку желбата да ги зближам нашите култури. Ги научив моите деца ерменски, одржував курс за оние кои имаа желба да го научат јазикот, изработив буквар на македонски јазик за изучување на ерменскиот, преведов три книги од македонски автори, кои денес се достапни во книжарниците во Ерменија. И го отворив „Мелти“, каде што секој ден се споделуваат култури, вкусови и традиции на нашите народи.

Како од лингвистика и уметност стигнавте до чоколадите? Што значи за Вас создавањето на „Мелти“?

– Уште од мала, уметноста и литературата беа оние во кои се пронајдов себеси. Пред изработката на чоколади, изработував глинени фигури, сликав, правев накит, работев со филигран и така ја започнав мојата кариера во Македонија. Но, отсекогаш имав посебна љубов кон кулинарството, по што се запознав со процесот на изработка на чоколади, кој самиот по себе е уметност, а преку кој јас сликам, изработувам и ја користам мојата креативност за нашите потрошувачи да добијат квалитетни производи, рачни изработки и најважно од сѐ, вкусови во кои ќе уживаат.

Чоколадата носи емоција. Каква емоција сакате да оставите со вашите производи? Дали секое парче има своја приказна?

– Сите производи во „Мелти“ се дел од мене и мојата уметност. Јас преку „Мелти“ сакам да дарувам љубов, секој од нашите купувачи да се чувствува како дома, да ужива во целост и да се збогати со нови вкусови. Иако во процесот на одбирање на палетата на производи не размислував за приказните зад нив, откако „Мелти“ ги отвори своите врати, секое парче доби своја уникатна приказна. Така, нашите „браунис“ и палачинки нè потсетуваат на децата од маалото, зад чискејкот стојат приказните на нашите верни купувачи, чоколадите се дел од празничните приказни на оние кои дарувале бонбониери или, пак, ги добиле како подарок, зад баклавата стои приказната дека поради неа запознавме многу нови луѓе. Приказните набрзо се напишаа сами по себе, а јас сум благодарна за секоја од нив. И со љубов работам кон креирање нови приказни и убави емоции, за секој што ќе дојде во „Мелти“ да излезе со своја слатка приказна.

Како е да се биде жена претприемач во Македонија? Со кои предизвици се соочувате, а што Ви дава најголема мотивација да продолжите?

– За мене да се биде жена претприемач е гордост и отсекогаш знаев дека јас ја сакам таа слобода во работата и чувството на припадност во бизнис кој е целосно мој. Мотивација добивам од мојата фамилија, од сите убави зборови од нашите потрошувачи, од сите оние кои уживаат во вкусовите на „Мелти“, од оние кои веќе имаат свои фаворити од нашето мени и оние кои секој пат пробуваат нешто ново, од маалото на „Мелти“ и од можноста за создавање и споделување на нашите производи.

8 Март е симбол за борбата на жените за своите права, но истовремено е и ден за славење на женственоста. Како Вие го доживувате овој празник?

– 8 Март за мене е поттик да продолжам да креирам, да ширам љубов и добрина, да учам и напредувам. Ме потсетува дека не сум сама во борбата против предизвиците и ме охрабрува самото тоа што низ цел свет има успешни приказни на оние мајки, жени и девојки кои не се откажале и не се откажуваат од својата цел. Па секој ден нека биде 8 Март, да ги охрабруваме нашите мајки и најдраги. Да покажеме љубов и поддршка кон оние кои како шампиони ги преовладуваат предизвиците пред себе и да ги слушнеме нивните успешни приказни.

Работилницата што ја организирате за 8 Март е вистински гест на љубов и дарување. Како настана оваа идеја и што сакате да им оставите на децата со ова искуство?

– Кога дојдов во Македонија, станав член на Меѓународната асоцијација на жените, каде што честопати организиравме работилници, дали за правење накит, сликање, пеење, одржување концерти итн. Желбата за одржување на нешто слично во „Мелти“ се роди таму. Но, одлуката за да биде детска работилница дојде од децата од нашето маало, кои секој ден се во „Мелти“ за палачинките со сирење, „браунис“ и за убавата дружба. Сакавме работилницата да биде дел од 8 Март, за сите тие мали креативци да им подарат персонализирани честитки на своите мајки. Со ова искуство сакаме децата да ја разбудат креативноста во себе, да создадат нешто свое, да се сигурни во своите изработки и да знаат дека секогаш имаат слобода да ги изразуваат своите идеи и чувства преку уметноста.

Колекцијата на чоколадите за 8 Март е уште еден ваш специјален проект. Дали има симболика во изборот на вкусови и дизајн? Што ја прави оваа колекција посебна?

– Уживам кога креирам празнични колекции. Тие се многу повеќе од само чоколадо. Секоја колекција има своја симболика и така како што беа колекциите за Нова година и „Денот на вљубените“, сега е време за 8 Март. Вкусовите во оваа колекција се микс од нашите познати чоколадни и овошни филови. Додека дизајнот е посебен сам по себе, како симбол за сите жени, за нашиот празник и за убавината, издржливоста и борбата која стои зад секоја од нас.

Ерменската кујна е богата со вкусови и традиции. Дали во „Мелти“ можеме да вкусиме нешто автентично од Ерменија? Кои специјалитети ги препорачувате и има ли некој што Ве потсетува на домот?

– Во „Мелти“ има најразлични ерменски специјалитети. Станавме препознатливи по нашата баклава, која е токму еден од специјалитетите кои најмногу ме потсетуваат на мојата мајка и на мирисот во нашиот дом кога таа ја приготвуваше оваа баклава. Затоа препорачувам сите да ја пробаат баклавата, а истовремено го препорачувам традиционалното благо гата, како и сите останати ерменски вкусови во „Мелти“.

Ако можете да им дадете порака на жените што сонуваат за свој бизнис, но се плашат да направат прв чекор, што би им рекле?

– Стравот е токму оној кој не ни дозволува да започнеме нешто ново и да се развиваме во нашите кариери. Верувајте во себе, вложете се себеси во бизнисот и пред вас ќе се отворат безброј можности. Најважно од сè, не дозволувајте препреките да ве обесхрабрат, напротив, учете од сите грешки, растете и набрзо ќе го постигнете она што отсекогаш сте го посакувале.