Александра е активна со настапи низ нашата земја. Често патува со својот бенд, настапувајќи во дискотеки и кафулиња. Препознатлива е по тоа што на нејзините настапи се пее 90 отсто македонска музика. Не крие дека три години е во љубовна врска со Иван, кој ѝ е најголемата поддршка.

Со Александра Јанева низ разговор за „Слободен печат“, за приватниот живот и кариерата…

Неодамна ја промовираше новата песна „Дождови“. Задоволна ли си од тоа како песната помина кај публиката?

– Најдоминантниот коментар од публиката е дека мелодијата е заразна и не им излегува од глава. Истото го почувствував и јас во студио додека ја поставувавме демо верзијата. А, кога мелодијата не ви излегува од глава, тогаш постојано ѝ се навраќате, ја слушате во круг и песната има потенцијал да прерасне во хит.

Стиховите „Ни букет од рози не те пере сега, ни океани солзи не те вадат сега“ привлекоа најголемо внимание и оставија најдобар впечаток кај публиката. Дали материјалните нешта и утешните награди можат да го заменат искреното извинување?

– Букетот е само метафора за многуте материјални нешта, подароци со кои бараме прошка или изнудуваме љубов, внимание. Отсекогаш било потешко да бидеш искрен, да бидеш прецизен со зборови и емоции, да признаеш вина и да се извиниш од дното на душата. Подарок во форма на материјални нешта може само да ги искомплицира работите, според мене. Докажувањето некому дека ви значи – со зборови и искрено извинување е она што го решава проблемот.

Колку често ти искрено се извинуваш и дали си прифатила искрено извинување кога тебе некој ќе ти згреши?

– Никогаш не ми било тешко да кажам извини, но во последниве неколку години се трудам воопшто да не се доведам себеси во таква ситуација да треба сериозно некому да се извинам. Затоа што не се чувствувам убаво кога некому сум згрешила и долго време по извинувањето ќе ми биде тешко. Инаку, прифаќам искрени извинувања, ми значат, па веројатно затоа и ги паметам речиси сите што сум ги добила во мојот живот.

Препознатлива си по тоа што на своите настапи пееш 90 отсто македонска музика. Колку беше тешко да се промовира исклучиво македонската музика на овие настапи? Како публиката реагираше на почеток, а како е сега?

– Кога јас почнав да пеам македонски песни на своите настапи, тоа беше нешто ново во тој период од 2012-2014 година. Повеќето пејачи изведуваа странска или музика од екс-ју просторите. Секоја промена е добро поздравена од публиката. Се потсетуваа на подзаборавените македонски песни, но и преку настапите ги дознаваа и новокомпонираните хитови. Така почнав, и сѐ уште се борам да продолжам иако предизвиците се сѐ поголеми. Многу добро реагираат на ретро мак-музика од 80-тите ,90-тите и 2000-те години, а некако потешко ја прифаќаат новата македонска музика. Сепак, стојам на ставот дека добрите песни се безвременски и порано или подоцна ќе си ја најдат бараната публика.

Како почна твојата музичка приказна и кога би ги измерила работите, кој настап е твојата лична карта или момент што ти ја одбележа кариерата?

– „Врати ми го сонцето“ е песна, интерпретација и емоција што во голема мера ми ја одбележа кариерата. Тоа беше на самиот почеток, а веќе оставам и ќе продолжам да оставам траги и со други песни и проекти. Како созревам, сѐ посилно се вљубувам во музиката и сакам што е можно повеќе музика да оставам зад себе.

Три години си во во врска со Иван кој е пораснат во Штип, но роден во Струмица. Како почна вашата љубов? И дали тој ти е поддршка во твојата кариера?

– Се запознавме преку заеднички пријатели, но љубовта се роди подоцна, кога двајцата почнавме да комуницираме сами, без посредници. Уште пред да се запознаеме, тој имал плејлиста на неговото УСБ во автомобилот со неколку мои песни и се уверив дека ги знае и ги сака повеќето мои песни по нашето запознавање. И двајцата сме си голема поддршка еден на друг, се мотивираме заеднички, ги славиме заеднички нашите успеси, но и заеднички се тешиме кога нешто не оди според планот.

Дипломиран стоматолог… од каде љубовта кон медицината. Има ли некој во твоето семејство што се занимава со оваа професија и дали веќе почна да работиш според струката?

– Јас сум првата која заврши стоматолошки факултет во семејството, но дали некогаш ќе бидам стоматолог по струка, времето ќе каже…

Колку често внимаваш на себе, на исхраната, имаш ли омилени ритуали за убавина? Што ја прави една жена убава, според тебе?

– Откако почнав да обрнувам внимание на изгледот на кожата, на првите знаци на стареење, се трудам да внимавам што е можно повеќе и да се хранам здраво. Редовно правам третмани на лице за чистење и хидратација, си поставувам аларми за потсетување да пијам повеќе вода итн. Жената е убава кога е среќна и исполнета. А, не можеш да бидеш среќен ако не се сакаш себеси, сопствената душа, тело. Затоа, подеднакво треба да се грижиме и за физичкото и за менталното здравје.

Каква личност си, смирена или избувлива и што најмногу може да те извади од такт?

– Во најголем дел сум смирена, кротка и разбирлива. Но, може да ме извадат од такт неколку работи: непочитување, некултура, ситуации во сообраќајот итн…

Веруваш ли во остварување на соништата и кои се твоите идни планови?

– Соништата се остваруваат само ако работиш на нив. Така што, не верувам во бесцелно мечтаење и во исчекување да дојдат подобри денови. Вистинското време е сега, утре ќе биде доцна.

Идните плановите се секогаш поврзани со музиката. Нови песни, нов албум, концерти…