Македонија по четири кола од Лигата на нациите во јуни и пред двете преостанати кола во септември, е на второто место во групата, едно подолу од она што сака да биде. Шансите за првото место на крајот на групната фаза, кое води во повисок ранг на натпревари во ЛН и во бараж за пласман на ЕП 0224, не ни се големи. Сепак, тие постојат.

Селекторот Благоја Милевски истакнува дека не е задоволен од бодовите што ги освоивме во првите четири кола, но задоволен е од залагањето на сите во тимот, затоа што сите го дале својот максимум. Што се однесува да шансите за качување на Македонија за едно место погоре на табелата, Милевски вели дека фудбалот е спорт во кој се можни секакви пресврти, никој не треба да се отпише, се е можно.

* Каква е вашата оценка за постигнатото по првите четири кола?

– Не сум задоволен од освоените бодови, затоа што според она што покажаа момците на сите четири меча досега, требаше да имаме пет бода повеќе. Мислам на мечевите против Бугарија и против Грузија. Задоволен сум од пристапот на репрезентативците, од желбата за победа, од односот кон националниот дрес. Секој го даде својот максимум. Од таа страна не можам да им замерам ништо на момците. Но, ни останува да ги одиграме уште тие два меча во септември, па ќе видиме што ќе биде. Нашата група покажа дека е изедначена, дека може секој да победи секого и да изгуби од секого.

* Некои ви замерија по поразот од Грузија во Скопје на изјавата дека (парафразираме) тоа е максимумот на нашата репрезентација во моментот.

– Изјавата беше од аспект на максимумот што го дадоа фудбалерите во контекст на периодот во кој се одигруваа тие четири натпревари. Не мислев на квалитативниот максимум на репрезентацијата генерално, туку на тоа дека во тој момент на физички план репрезентативците толку можеа да дадат од себе. А во таа смисла го дадоа максимумот што го имаа во тој момент, ќе повторам.

* Какви ни се шансите во преостанатите две кола да се качиме за едно место погоре на табелата?

– Во фудбалот се случуваат изненадувања и неочекувани резултати. Видете ја нашата група. Бугарија играше нерешено со Гибралтар на гости, отиде во Грузија и исто така играше нерешено со тој тим. Пред тоа Бугарија (дома н.з.) загуби 2-5 од истата таа Грузија. Не би исклучил никого до крајот. Ни Гибралтар. Тоа е репрезентација која во последите години напредува. Ни остануваат уште тие две кола со Грузија на гости и со Бугарија дома. Грузија треба да одигра со нас и со Гибралтар на гости. Во фудбалот се е можно и на никого не треба да му ја одземате можноста да се надева на победа против било кого. Сведоци сме во последниве денови на фудбалски резултати кои се вон секоја логика, но се случуваат.

* Повеќе млади фудбалери во националниот тим во овие четири меча добија минутажа. Дали сте задоволен од ефектот?

– Стратегијата на ФФМ и моја, е да бараме тим кој ќе биде конкурентен не само моментно, туку и на долги патеки. Сето тоа што го правевеме со вклучување на млади играчи е дел од тоа. Дел од поискусните репрезентативци поради замор и повреди беа исклучени од овие четири меча. Сите млади што добија одредена минутажа (а сите добија), покажаа дека имаат потенцијал и талент да бидат дел од оваа репрезентација, но на нив е да се покажат со своите игри во клубовите за да бидт конкурентни во репрезентацијата – ни изјави Милевски.

Македонија досега во Лигата на нациите (Ц), група 4, одигра реми на гости со Бугарија (1-1), победи кај Гибралтар (2-0), претрпе пораз дома од Грузија (0-3), и дома го победи Гибралтар (4-0). Ни останувата мечевите со Грузија на гости и со Бугарија дома (23. и 26. септември) Табела: Грузија 10, Македонија 7, Бугарија 3, Гибралтар 1.