Младиот пејач Јасмин Алиевски публиката го запозна во српското натпреварувачко шоу „Ѕвездите на Гранд“. Неговите настапи беа токму од оние на кои позитивно реагираше жирито, па многумина коментираа „македонскиот пејач растури во Гранд“.

Шоуто му донесе популарност, но и песна снимена за српска продукција. Сепак, вели Алиевски, во Македонија не е лесно да се биде артист. Не крие дека освен со музиката, среќен е и во љубовта со својата партнерка Кристина, со која е верен, но и дека поради семејниот бизнис се повлекол од музиката.

Јасмин, со години преку твојата музика се трудиш да опстанеш на музичката сцена. Тешко ли е да си пејач во Македонија?

– Со оглед на тоа дека неколкупати правев подолги паузи во мојата кариера, да бидам искрен, навистина не знам колку сум соодветен за ова прашање. Но, ако земеме предвид дека Македонија е мал пазар, би рекол дека е тешко да се опстане на музичката сцена.

Колку натпреварувањето на „Ѕвездите на Гранд“ ти помогна во градењето кариера?

– Натпреварувањето во ова регионално шоу, беше нешто за кое со радост зборувам. Ми помогна во афирмирањето како пејач, и тоа надвор од нашите граници. Драго ми е и убаво ми е што луѓето почнуваат и таму да ме препознаваат. Тоа навистина многу ми значи, веројатно сум оставил добар впечаток.

Кој ти беше ментор, дали сѐ уште сте во контакт и кои совети најчесто ги добиваше од него?

– Ментор ми беше Ѓорѓе Давид. Обврските во „Ѕвездите на Гранд“ се огромни, особено ако си дел од жирито, па поради тоа и немаме многу време за дружење и комуникација по натпреварувањето. Ѓорѓе Давид пред секој настап ми велеше дека треба да верувам во себе и никогаш да не престанам со работа. Јас и сега се држам до тие негови зборови, затоа што знам дека само со работа и труд може да се успее во градењето музичка кариера.

Пееше на „Макфест“, а веднаш потоа објави и песна со етикетата на „Гранд“. На која сцена се гледаш повеќе и зошто?

-Искрено, секаде сакам да сум присутен. Ги гледам само предностите од тоа да си на две сцени во нашиот регион. Воопшто не ми е важно дали повеќе ќе сум на македонската или на српската сцена. Најважен е исходот од сето тоа, најдобро е да сум и на двете сцени еднакво.

Создаваш музика и на македонски, но и на српски јазик. Кои песни повеќе ти се слушани?

– Во моментов имам една песна на српски јазик „Па како буде“. Таа моментално е врвот, како најслушана моја песна.

Планираш да им се вратиш на настапите по познатите локали. Зошто толку време паузираше?

– Претходно повеќе бев посветен на семејниот бизнис, немав многу време за настапи во нашите локали. Кога одлучив да се вратам на сцената, ни се случи короната. Секако и мене ми требаше време за да се решам и мислам дека сега е вистинско време да се вратам во полн сјај.

Се ближат новогодишните и божиќните празници, какви ви се плановите со партнерката Кристина?

– Имаме многу планови, хаха. Но, се разбира, ќе бидеме со семејството и со пријателите, заедно со нив ќе ја прославиме Новата година.

Колку Кристина ти е поддршка во сѐ што правиш, добиваш ли критики од неа?

– Кристина ми е огромна поддршка. Но, да бидам искрен, секако дека добивам по некоја критика и од неа и од моите родители. Повеќе умови подобро размислуваат.

По што ги паметиш новогодишните празници, какви спомени носиш од детството?

– По руска и француска салата и кифлички, но и по некоја испукана петарда и огномет.

Која е твојата желба за Новата 2024 година?

– Да сме живи и здрави и сите планови и желби што ги имаме зацртано, да ни се остварат.