Таеквондото е олимписка дисциплина, боречка вештина, што ни носи врвни резултати, а веруваме дека базата на успешни натпреварувачи во овој спорт се зголемува и не се сомневаме дека така ќе биде и во иднина. Како медиум продолжуваме со традицијата да ги промовираме младите перспективни спортисти кои со сето срце и волја ги бранат боите на Македонија на меѓународната сцена.

Меѓу нив е и Христијан Симоновски, нова голема надеж во таеквондото, една деценија веќе член на Хулк Академија (еден од најтрофејните клубови), повеќе за неговите почетоци и настапи, повеќе прочитајте во продолжение.

Хулк Академија инаку имаше успеси на меѓународниот турнир во Ниш, Србија, настапи со седум натпреварувачи од кои сите имаа пласман за медал (1 златен, 2 сребрени и 4 бронзени). Екипно првоместо А класа кадети, а се издвојува Симоновски на кој овој настап му беше 11-ти без пораз со освојување на златен медал.

Како започна љубовта кон таеквондото, што беше причината да бидеш дел од овој спорт?

– Како мал, татко ми ме носеше да гледам деца како вежбаат разни спортови, сè додека еден ден не ме однесе да гледам таеквондо. Уште веднаш се заинтересирав во спортот и сакав да бидам дел од него. Почнав рекреативно да се занимавам со спортот сè додека не бев воведен во правата уметност на спортот – натпреварите и започнав сериозно да се занимавам.

Што за тебе претставува таеквондото?

– Таеквондото го гледам како еден вид на уметност, вид на релаксација и место каде што се пронаоѓам.

Во кој клуб и каде ги одржуваш тренинзите, дали си задоволен од условите?

– Член сум во Хулк Академија веќе 10 години, клубот изобилува со две специјализирани сали за боречки вештини и условите секогаш биле на високо ниво и овозможувале простор за напредок.

Во која категорија моментално настапуваш и кои се твоите тренери?

– Моментално настапувам како Кадет А (Cadet A) во категоријата -61кг. Додека од јануари веќе настапувам како јуниор каде што конкуренцијата е посериозна. Мојот тренер е Филип Анастасовски кој вложи многу труд и внимание во мене да ме направи тоа што сум денес.

Учествуваше на меѓународниот турнир во Ниш, Србија, го освои златниот медал, кажи ни нешто повеќе околу твојот настап?

– Беше уште едно сериозно искуство каде што се соочив со противници и од Р. Бугарија и воедно се запознав подобро со новите таеквондо правила. Натпреварот помина во одличен ритам каде што и јас самиот бев задоволен од мојот настап

Кои се твоите најдобри досегашни успеси кои сакаш да ги издвоиш?

– Во мојата кариера имам отидено на многу натпревари и имам остварено многубројни успеси, но најдраг ми е настапот на Херкулес опен 2021 (Herkules open 2021) во Белград, Србија, каде што доминантно ги совладав противниците и бев прогласен како „човек на мечот“ („man of the match“).

Како изгледа еден твој обичен ден, секако покрај обврските во таеквондото, тука е и образованието..

– Кога имаш желба за нешто нема потешкотии да се организираш, иако денот ми е исполнет со обврски секогаш имам време за спортот и за образованието, па и за дружба со другарите.

Како течат подготовките и кои се твоите следни цели кои сакаш да ги оствариш во иднина?

– Секојдневно се одржувам физички и кондиционо, работиме со тренерот напорно за да настапиме на Г1 (G1) натпревари каде што се бркаат норми за олимписки настап.