Димитар Ковачевски е актуелен заменик-министер за финансии. Магистрирал економски науки на Универзитетот „Св. Кирил и Методиј“, а докторирал на Универзитетот во Подгорица, Црна Гора. Тој е вонреден професор на Факултетот за деловна економија и менаџмент на Универзитетот „Американ колеџ“ во Скопје. Работната кариера ја започнал во „Македонски телеком“, а продолжил во „Оне вип Македонија“.  Бил на повеќе партиски функции, меѓу кои и член на Извршниот одбор. На гласачкото ливче го има бројот 1.

Дали и во која насока имате намера да спроведете внатрепартиски реформи во СДСМ?

– Реформи во партијата се нужни и тоа најдобро го потврдува резултатот на последните избори. Оттука, во мојата програма се предвидени промени како во начинот на комуникација со членството, така и во функционирањето на органите на партијата во насока на поголема ефикасност во работењето. СДСМ има голема база на поддржувачи и членови кои се активни, но и многу кои биле активни во минатото, а од одредени причини се пасивизирале. Тие причини се различни, но од моите разговори во рамките на средбите што ги одржувам, може да се групираат во неколку клучни проблеми. Прво, потребна е многу поголема присутност на партиското раководство, но и на функционерите на СДСМ на терен и поблиска комуникација со членовите. Не смееме како партија да дозволиме членството да го бараме само за избори. Второ, партијата мора да изгради систем во кој секој глас ќе биде слушнат и испочитуван. Членовите и активистите на СДСМ одлично ги знаат проблемите и секогаш добронамерно сугерираат кога работите одат во погрешна насока. Не смееме да биде глуви за овие пораки, треба да ги слушнеме и, уште поважно, да постапуваме. Понатаму, партијата треба значително да ги засили органите и работата на телата од најниско ниво, како месните организации, па сѐ до партиските комисии. Во програмата предвидувам сериозна активација на партиските комисии, кои ќе бидат основни тела за развој на политики, проекти и поддршка на институциите. Тука ќе членуваат најкомпетентните партиски членови, но и луѓе однадвор, а идеолошки блиски до партијата. Месните организации ќе се активираат многу повеќе со јасни одговорности и активности, а нивната работа редовно ќе се евалуира. Понатаму, потребно е да ја подигнеме внатрепартиската демократија на уште повисоко ниво. Се залагам претседателите на општинските организации на локално ниво исто да бидат избирани непосредно како и претседателот на партијата. На тој начин ќе ги избереме најпочитуваните луѓе на сите позиции, а со тоа ќе зајакнеме поддршката и кај членовите, но и кај пошироката јавност. Ова се само дел од промените што сметам дека треба да ги направиме, но ако бидам избран за претседател, ќе направам потемелна анализа за состојбите и ќе подготвиме нова политичка и организациска стратегија.

Имате ли намера да се справите со партискиот клиентелизам во СДСМ во рамките на функционирањето на државата?

– За да се справиме со клиентелизмот, мора да ја промениме перцепцијата и навиките на луѓето да гледаат на партиите единствено како канал преку кој може да си ги реализираат личните цели и интереси. Ваквиот вредносен систем, за жал, доведе до тоа квалитетните луѓе да се држат подалеку од партиите, а пак во нив често да се наоѓаат оние што повеќе сакаат да земат отколку да дадат за државата и за општеството. Ова мора да го менуваме со јасен систем на вклучување и напредување на оние што имаат примарна цел да го дадат своето знаење и компетенции на услуга на граѓаните. Мојата визија е да изградиме токму таков внатрепартиски систем на избор и поставување кадри. На тој начин, не само што ќе го подигнеме квалитетот на луѓето што раководат со државата и со институциите, туку и ќе ја менуваме перцепцијата и ќе привлекуваме уште покомпетентни луѓе во политиката. Ако ги погледнете развиените европски земји, ќе видите дека таму е предизвик да се премине од високи менаџерски позиции во приватниот сектор во државниот сектор. Тоа е така затоа што тоа е престиж, а во државен сектор работат најголемите професионалци во различни области. Ова воопшто не е лесно да се постигне, но со добра кадровска политика во партијата, тоа ќе се преслика и во администрацијата.

Сите политичари говорат за неопходноста од борба со корупцијата. Кој е Вашиот конкретен план во таа област?

– Јас сум човек што доаѓа од приватниот сектор, со искуство во меѓународни компании каде што целиот живот сум работел по принципот „нулта корупција“. На корупцијата гледам како голем проблем што ги поткопува сите сфери во јавниот живот и директно влијае врз квалитетот на услугите што граѓаните ги добиваат од државата. Оттука, битката, според мене, треба да се одвива во две насоки. Прво, како политичари и функционери мора да покажеме личен пример и одговорност, односно да се понесува политичка одговорност секогаш кога ќе има сериозен сомнеж за корупција. Со тоа пораката кон сите функционери е дека нема да има политичка заштита во случај на злоупотреба. Ова значително ќе влијае врз однесувањето на сите лица во државните и во јавните институции. Оттука почнуваат промените и ќе се залагам за вакво владеење и однесување на сите во партијата. Потоа, според законот треба да има независна правна постапка. Се случува и во правните постапки да има недоследности или сомнеж дека тие се водат нетранспарентно. Со ова доаѓаме до вториот проблем, а тоа се реформите во правосудството каде што сметам дека е направен голем напредок, но има уште работа. Како држава мора да продолжиме со реформите во правосудниот систем и да ги имплементираме најдобрите европски практики. Колку повисоко ниво на политичка одговорност и понезависен правосуден систем постигнеме, толку повеќе ќе ја намалуваме корупцијата во општеството.

Билатералните проблеми со Република Бугарија ја блокираат евроинтегративната перспектива на нашата држава. Би менувале ли нешто во пристапот на решавањето на овој проблем?

– Во моментов сум фокусиран на кампањата за претседател на СДСМ и зборувам пред сè за политиките и за реформите во партијата. Верувам дека Владата и владиниот тим прават сè за да најдеме прифатливо решение и конечно да се одблокираат евроинтеграциите. Оваа Влада на чело со премиерот Заев направи историски чекори во интерес на сите граѓани кога станува збор за европската иднина на земјата. Евроинтеграциите остануваат највисок приоритет, бидејќи друга стратешка определба немаме. Верувам дека владиниот тим има мудрост и знаење да ја надмине и оваа последна пречка и за тоа ја давам мојата целосна поддршка.