Во периодот на изолација во кој живееме, сите сме свртени кон иднината, размислуваме за тоа што ни носи таа и како ќе изгледа. Притоа ја забораваме сегашноста и попатните моменти кои треба да ги создаваме, особено скапоцени во приликите кои живеат од минијатурните кадри во четирите ѕида.

Колку такви волшебни кадри може да има секој ден, докажува и оваа фотографија снимена во Париз за време на карантинот.

Оваа сцена, која е како од трејлер за романточен филм, ја снимила сосема случајно Емили Тауберт, дизајнерка која пред 18 месеци од Бризбејн се доселила во градот создаден за меден месец, веридба и секако, за прв бакнеж.

„Во Париз секој ден може да се открие нешто што инспирира – уличка, галерија или продавничка, возбудување никогаш не недостасува. Тоа е град создаден за оние кои сакаат убавина, архитектура, стил.

Но со затворените музеи, паркови и ресторани, се чини како градот за момент да ја изгуби душата. Истовремено доби прилика да диши, а птиците пејат како никогаш претходно.

Почнав да фотографирам од мојот стан зашто бев фрустрирана што морам да бидам во изолација и што не можам да лутам по париските улици како порано. Но тогаш сфатив колку работи можеме да видиме низ прозорецот, почнав да забележувам слики на кои претходно не би им обрнувала внимание.

Така настана и романтичната фотографија, украден момент на непречена љубов на терасичката во Латинскиот кварт.

Ја снимив малку пред осум часот навечер, во времето кое во април во Париз се нарекува и Час на благодарноста. Тогаш излегуваме на балконите и на прозорците, и со ракоплескање им се заблагодаруваме на сите оние кои ни помагаат во оваа за сите тешка и предизвикувачка ситуација.

Фотографијата многу брзо стана вирална бидејќи мислам дека го фати духот на она што луѓето сакаат да го чувствуваат и да го доживеат“, вели Емили.

Погледнете ги нејзините фотографии.