Со засилени контроли на терен, Општинскиот инспекторат им налага на угостителите чии угостителски објекти се на Широк Сокак, урбаната опрема што ја поставуваат пред објектите, да не отстапува од утврдените правила.

Со бела лента пред угостителските објекти на Широк Сокак, точно е означено до каде можат да бидат поставени масите и столиците на најамбиенталната улица.

-Инспекцискиот надзор е во согласност со политиката на локалната самоуправа за спроведување и почитување на правилата и прописите, а со тоа и постигнување на целта за уреден град, во кој Широк Сокак навистина ќе биде широк-информираат од Општина Битола.

Оттаму додаваат дека контролите се спроведуваа и во изминатиот период, но, по барање на граѓаните, деновиве истите се интензивираат и ќе траат се до комплетно уредување на Широк Сокак пред секој објект, согласно законските прописи.

-Поставувањето на урбаната опрема на најамбиенталната улица во Битола, мора да биде во согласност со утврдените правила и прописи и издадените одобренија од Општината. Со цел отстранување на отстапувањата кај некои угостителски објекти и овозможување на доволно пешачка зона, Општинскиот инспекторат, врши интензивни контроли на терен, притоа давајќи им налог на угостителите за итно постапување, согласно усвоените план и програма за поставување на урбаната опрема-велат од Битолската локална самоуправа.

Инаку, според Програмата за поставување урбана опрема, од центарот на улицата 2,25 метри од лево и десно треба да биде слободен простор за минувачите.

Неодамна, беше формирано и работно тело кое треба да изработи нова Програма за поставување урбана опрема со цел угостителските објекти на Широк Сокак да бидат поубаво уредени и со еден унифициран изглед, да се задржи автентичноста на амбиенталната улица.

Архитектите од Битола на првата седница на новоформираното работно тело јасно и недвосмислено се изјаснија дека се против какво било заградување на угостителските објекти на Широк Сокак, бидејќи според нив освен што се нагрдува најамбиенталната улица, тоа претставува и узурпција на јавниот простор и се нарушува автентичноста на улицата.

-Како стручна фела сметаме дека не треба да постојат тие стакленици, затоа што прво претставуваат узурпација на јавниот простор и го нагрдуваат ликот на Битола. И според закон тие не треба да постојат. Нашиот став е дециден дека во оваа програма што треба да се изготви, стаклениците не треба воопшто да постојат-рече Мила Рориќ архитект и членка на работното тело за изготвување на новата програма за поставување на урбана опрема во Битола.

Од Здружението за угостителство и туризам „Еснаф“, кое е дел од работното тело се согласни дека заградувањето на просторот пред кафулињата го нагрдува Широк Сокак,но, од друга страна се пожалија дека бизнисите ќе ги затворат ако не работат со затворени тераси, бидејќи повеќето од гостите им се пушачи.

Советничката Анастасија Трајковска, претседател на работното тело за „Слободен печат“ информираше дека следна седница на новоформираното тело кое треба да изработи нова програма за поставување урбана опрема со цел угостителските објекти на Широк сокак да бидат поубаво уредени, ќе се одржи после редовната седница на Советот на Општина Битола закажана за 22 мај.