53-годишен измамник се претставувал како британски кардиолог во Индија и извршил операции на отворено срце на повеќе пациенти, а седуммина од нив починале,

По последната неуспешна операција, лажниот доктор по име Нарендра Викрамадитја Јадав кон средината на февруари побегнал од клиниката и оттогаш бил во бегство. Полицијата сега конечно успеала да го уапси, пренесува „Би-би-си“.

Јадав речиси две децении работел како лекар, а според полицијата, тој признал дека ги фалсификувал своите медицински квалификации.

Случајот првпат излезе на виделина во февруари, кога Комитетот за заштита на децата во Дамо ги извести окружните власти за смртта на последниот пациент на Јадав. Тогаш и семејството на починатата жена го пријавила измамникот во полиција“.

„Веднаш откако мајка ми почина, лекарот исчезна“, изјави нејзиниот син за индиската телевизија NDTV.

Лажниот лекар се претставувал како познатиот британски кардиолог Џон Кам. Вистинскиот Џон Кам, поранешен професор по кардиологија на Универзитетот „Сент Џорџ“ во Лондон, вели дека знаел за „двојникот“ и дека со години, заедно со неколкумина колеги, залудно се обидувал да го спречи лажниот Кем – но залудно.

Болницата во градот Дамо соопшти дека нема сознанија за наводните фалсификувани потврди на лажниот доктор.

„Никој не се сомневаше дека е лажен лекар. Тој добро си ја вршеше работата и се однесуваше како врвен професор“, изјави вработен во болницата.