Европејците се повеќе загрижени за имиграцијата отколку за климатските промени, додека помалку од 15 отсто од анкетираните ширум светот сметаат дека климатските прашања треба да бидат меѓу првите три приоритети на нивните влади, според студијата на данската Фондација Алијанса за демократија.

Во изминатите две години, во многу европски земји, нагло се зголеми бројот на луѓе кои веруваат дека намалувањето на имиграцијата треба да биде главен приоритет на владите, покажа извештајот на индексот на перцепција на демократијата за 2024 година. Данската организација тврди дека тоа е најголемата годишна студија во светот за тоа како луѓето ја гледаат демократијата.

Растот на оние кои сметаат дека имиграцијата е најголем проблем е придружен со намалување на уделот на граѓани кои сакаат климатските промени да бидат приоритет. Таа промена е најизразена во Германија, која, на глобално ниво, има најголем удел на луѓе кои сакаат нивната влада да се фокусира на намалување на имиграцијата.

Во студијата се наведува и дека и покрај фактот што 33 отсто од светското население верува дека климатските промени се еден од трите главни глобални предизвици, само 14 отсто сметаат дека борбата против овие промени треба да биде меѓу првите три приоритети на нивната влада.

Испитаниците во западните демократии, особено во Европа, почесто ги гледаат климатските промени како главен глобален предизвик, но и главна задача на нивните влади, се наведува во студијата.

Нико Јасперс, главен извршен директор на агенцијата Латана, која го спроведе истражувањето, рече дека резултатите покажуваат дека војната и насилните конфликти се сметаат за најголеми предизвици во светот, заедно со сиромаштијата и климатските промени.

„Охрабрувачки е да се види дека вербата на луѓето во идејата за демократија е најголема што некогаш била, но ако демократските земји не се способни да помогнат во решавањето на светските предизвици, тогаш ќе биде само прашање на време кога таа поддршка за демократијата почнува да опаѓа“, рече Јасперс.

Индексот на перцепција на демократијата е студија спроведена од Латана и Алијансата во пролетта 2024 година, помеѓу 20 февруари и 15 април.

Изданието од 2024 година нуди споредба на глобалните ставови кон демократијата во време на зголемени геополитички тензии и насилен конфликт. Резултатите се засноваат на национално репрезентативни интервјуа со повеќе од 62.953 испитаници од 53 земји.