Велешката полиција за два дена забележала два одвоени случаи на измама која се прави преку социјалните мрежи. Се работи за шема во која жртвите се лажат да платат пари однапред за изнајмување на стан кој всушност и не постои, пишува „СДК.мк“.

„На 2 октомври во 19:30 часот во СВР Велес, 38-годишна жена од битолско село пријавила дека била измамена од едно лице за сума од 28.400 денари. Според пријавеното, таа се зачленила во група на социјална мрежа со цел да најде стан под закуп во Скопје, по што била контактирана од лицето Н. П., а откако се договориле, парите за закуп електронски ги уплатила на банкарска сметка. Како што е пријавено, потоа лицето било недостапно за контакт и сфатила дека била измамена. Исто така, на 1 октомври, 42-годишна велешанка на ист начин била измамена за сума од 15.000 денари за закуп на стан во Велес“, вели портпаролката на СВР Велес Биљана Ѓаковска.

МВР апелира луѓето да бидат внимателни кога комуницираат со непознати на социјалните мрежи, особено кога им бараат пари.