Со постојана задолжителна придружба поради безбедноста – да, но дали и секое движење на највисоките функционери, во слободно време, за приватни цели, за патување на викенди во Македонија или во странство треба да биде извршено со службено возило? Ова е прашањето што се наметна во јавноста откако викендов претседателот на Собранието Африм Гаши со службено возило и со придружба отиде во Косово за да присуствува на приватна забава – свадба.

Според коалициските партнери ВМРО-ДПМНЕ и Вреди, од чии редови е Гаши, придружбата е задолжителна во сите околности поради безбедносни причини, но за користењето на возилата во државна сопственост за приватни цели, немаат јасен одговор. Упатуваат тоа да го разјасни МВР и Државната комисија за спречување на корупцијата.

СДСМ: Гаши можел и со приватно возило да оди на свадба

Од Вреди денеска се изјаснија дека се прави тема таму каде што ја нема.

– Јасно ни е дека по 22 години режим на ДУИ, граѓаните имаат високи очекувања од новата власт. Ваквите ситуации што во минатото не биле ни дискутирани, денеска се клучни теми на медиумите, што сметам дека е бесправно, затоа што станува збор за второ лице во државата, а законските прописи предвидуваат претседателот на Собранието, каде и да отиде, да биде во придружба на обезбедувањето, така што ова е во рамки на прописите – рече вчера Фари Хисени, портпарол на Вреди на прес-конференција.

На прашањето дали Гаши има патен налог издаден од Собранието за да го користи возилото за приватно патување во Косово, Хисени рече дека тие како партија немаат информации за тоа прашање во собраниска надлежност.

– МВР треба да го истражи целиот настан и да информира дали е сè според прописите. Ние застануваме зад соопштението на Кабинетот на претседателот, ние не знаеме дали користел патен налог. Автомобил му следува како на втор човек во државата. Во претходната власт службените возила ги користеа и лица од кабинетите, како и вработени што со месеци не биле на работа, и тоа и во државата и надвор од државата – рече Хисени.

Во врска со тоа што возилото на Гаши беше снимено во свадбена поворка, портпаролот Хисени рече дека возилата кои во поворка одат по невеста се и македонски и албански обичај и нема ништо спорно што Гаши бил во поворката. Тој потврди дека службените возила со кои патувал Гаши поминале на „брза лента“ на граничниот премин, но не знаеше дали освен придружбата на спикерот, без задржување на границата поминале и други приватни возила.

– Ние сме апсолутно задоволни од неговото раководење со Собранието. Имајќи предвид какви собраниски претседатели имаше, Гаши е човек со интегритет, принципи и морал – рече Хисени.

Денеска опозициската СДСМ остро реагираше на приватното патување на Гаши со службено возило.

– Скандалите на коалицијата ВМРО-ДПМНЕ и Вреди не запираат и секој следен е поскандалозен од претходниот. Најновото своеволие на претседателот на Собранието Африм Гаши потврдува дека не само што немаат намера да престанат со прекршување на правилата, туку тоа ќе го прават без да се грижат што мисли јавноста и граѓаните – рече Богданка Кузеска, портпаролка на СДСМ.

Таа истакна дека МВР и Собранието должат повеќе одговори.

– Тошковски и МВР треба во најкус рок да одговорат дали имал Гаши патен налог и документација со себе за ова одење по невеста? По која основа бил даден налогот и на колку денови? Бараме налозите, се разбира, ако постојат, да се објават во јавноста. Граѓаните веќе не им веруваат на зборовите на Тошковски и МВР, потребни се докази. Го прашуваме скандал мајсторот Гаши дали е етички со службено возило да оди по невеста во Косово? Дали знае дека тој може со приватно возило да патува, и покрај тоа што неговото обезбедување може да користи службени возила? Дали знае дека е понижување за државата, вториот човек по ранг да оди по свадби и по невести со службено возило во соседни држави? Свесен ли е Гаши воопшто за важноста и достоинството кое треба да го носи позицијата претседател на Собранието или го смета тоа за приватна своина? – праша Кузеска.

Таа го праша и премиерот Христијан Мицкоски до кога ќе ги гази сопствените ветувања и зошто го убедуваше народот дека секој политичар од неговата Влада кој се однесува непримерно и несоодветно ќе биде сменет.

Од ВМРО-ДПМНЕ истакнаа дека носител на позиција каква има Африм Гаши е проследена со задолжителен протокол и постојана придружба, а немањето обезбедување е прекршок за санкција, но не одговорија дали Гаши имал патен налог.

– Дали, според СДС, требало да се прекршат законите во случајот на Африм Гаши? Оваа држава има институции. СДС тоа тешко го сфаќа зашто во нивно време министрите во работно време играа фудбалчиња во кабинет, полицајци се удираа во пајаци, во присуство на Ахмети се пукаше со калашникови, а Оливер Спасовски делеше пасоши на мафијаши – соопшти ВМРО-ДПМНЕ.

Случајот ќе се истражува

Од опозициската Левица, која веќе поднесе интерпелација за Гаши во Собранието, ја повикаа ВМРО-ДПМНЕ да ја поддржи.

– Скандал се случи викендов кога претседателот на Собранието Африм Гаши, со службено возило и државно обезбедување одел на свадба во Косово и Метохија, а за сопствените приватни потреби го блокирал целиот граничен премин. Функционерските привилегии се стимулатор на расипничко однесување на функционерите, без разлика дали се избрани или именувани. Нивната секојдневна злоупотреба беше извор на проблеми во претходната влада, но истото продолжуваат да го прават и функционерите од новиот владин состав – соопшти Левица.

Дивеењето на коалицискиот партнер на Мицкоски и ДПМНЕ, се додава во соопштението, е евидентно уште од конститутивната седница!

– За збеснатиот Гаши Левица веќе поднесе интерпелација по седум точки и чекаме да биде ставена на дневен ред. Бланко-поддршката за избор на претседател на Собранието од редовите на ДПМНЕ останува. Потсетуваме и дека пред само неколку недели, обезбедувањето на Гаши впери пиштол во полициски службеник на скопскиот аеродром – соопшти Левица.

Партијата истакна дека тие се залагаат за укинување на привилегиите за функционерите, патните трошоци и апанажата, а службените возила да носат специјални црвени регистарски таблички и ГПС-локатори за мониторинг кој каде ги вози, како и ограничување на бројот на службени возила на три до пет.

Од МВР викендов соопштија дека проверуваат дали постои злоупотреба од страна на собранискиот спикер.

„Ве известуваме дека надлежните служби во МВР вршат соодветни проверки со цел утврдување на фактичката состојба“, информираат од МВР.

Службените возила се употребуваат со соодветен патен налог, со образложение за намената за која се користат, времетраењето и трошоците за патувањето. Тоа го истакнаа и од ЛДП, која инсистира Гаши да одговори дали има патен налог и како може да го оправда ова патување.

– Ако имал, бараме образложение по која основа е издаден тој налог, за која намена, во кое времетраење и колку сето тоа нѐ чини нас, од чии даноци и се одржуваат возилата и државниот возен парк – соопшти Либерално демократската партија.

Од Собранието викендов известија дека претседателот на Собранието е придружуван од обезбедувањето 24/7, како што е наложено со закон.

– Тој на 17 август 2024 година, заедно со неговото семејство, отпатува во соседната земја Косово. Оваа посета беше целосно транспарентна и усогласена со сите потребни процедури. Пред поаѓањето уредно беа известени и МВР и МНР и е доставена сета потребна документација според утврдениот протокол за секое службено лице кое ја напушта државата.

Надлежните органи можат да ја потврдат оваа информација, дека сите постапки се во согласност со одговорностите и обврските на претседателот на Собранието – соопштија од Кабинетот на Гаши.

Од Антикорупциска, пак, најавија дека деновиве ќе разгледуваат дали има основа за постапување за злоупотреба на службено возило.

– Во координација со надлежните органи ќе утврдиме дали има основа за постапување во овој случај. Треба да се има предвид уредбата на МВР која регулира кои лица се под постојано обезбедување, во кои спаѓа и претседателот на Собранието. Би сакала да истакнам дека движењето е поврзано со постојаното обезбедување, додека целите и потребите се во доменот на етиката и моралот на функционерите, во зависност од потребите тие да се рационализираат и да се штедат – истакна претседателката на ДКСК, Татјана Димитровска.