Поранешниот албански претседател Илир Мета останува во притвор, одлучи денеска Врховниот суд, кој го отфрли барањето притворот да се замени со поблага безбедносна мерка и со тоа ја потврди одлуката на Aпелацискиот суд, јави „Гласот на Америка“ на албански јазик.

Адвокатите на Мета го поднеле барањето бидејќи со притворот, според нив, „се попречува неговата политичка кариера и развојот на изборната кампања, бидејќи парламентарните избори се одржуваат на 11 мај“.

Мета, по налог на Специјалното обвинителство против организиран криминал и корупција (СПАК), беше уапсен на 21 октомври лани, под обвинение за „пасивна корупција“, перење пари и прикривање имот.

Во аудиопорака објавена на социјалните мрежи по одлуката на Судот, Мета најави „брзо движење кон Судот за човекови права во Стразбур“. Тој го обвини СПАК дека дејствувало по наредба на премиерот Еди Рама, за да ја нападне опозицијата и Партијата на слободата во пресрет на парламентарните избори. Во неговата аудиопорака, ги повикува Албанците на 11 мај да гласаат за „уривање на наркодржавниот режим“.

Мета (56) беше претседател на Албанија во периодот од 2017 до 2022 година, по што повторно застана на чело на партијата Социјалистичко движење за интеграција, чие име го смени во Партија на слободата.

Тричленото судско тело на Врховниот суд не ја смени ниту мерката за пратеничката на Партијата на слободата, поранешната сопруга на Мета, Моника Круемади, потврдувајќи и ја мерката задолжително јавување во Специјалниот суд. Таа е под истрага поради сомнение за перење пари, корупција и непријавување имот