Илир Мемеди ќе го замени Фахрудин Хамиди, доскорешен директор на М-НАВ. Смена има и кај вториот директор на М-НАВ. Така наместо досегашниот Љубе Стаменковски, доаѓа Милан Кораќ, кој е оперативен инженер техничар во М-НАВ. Третиот директор Хасим Деари, според информациите на „Слободен печат“, нема да биде сменет. Ова е епилогот од владината седница на која се расправаше за состојбите во оваа институција, кои ескалираа минатата недела и тоа по прес-конференција на Синдикатот на контролорите на летање, кога неколку лица насилно упаднаа во објектот од кој се надгледува и осигурува безбедноста на авиосообраќајот над Македонија и физички нападнаа контролори на летање. Да потсетиме дека претседателот на партискиот огранок на ДУИ во Чаир, Беким Незири, кој ги отвори вратите на радарската кула и кој им дозволи на насилниците да влезат во зградата на М-НАВ, беше приведен во полициска станица откако со часови беше недостапен за полицијата. Од минатиот викенд Незири е во домашен притвор, иако се бараше да остане во затворски притвор.

Предлог заклучокот до кој дојде „Слободен печат“ од владината седница гласи: „Владата заклучи да му препорача на Надзорниот одбор на АД во државна сопственост за вршење дејност давање услуги во воздухопловната навигација (М-НАВ) АД Скопје, од должноста членови на УО да ги отповика Фахрудин Хамиди (извршен директор во СВН) и Љубе Стаменковски (извршен директор во СВТ), за членови да ги избере Илир Мемеди (извршен директор во СВН) и Милан Кораќ (извршен директор во СВТ)“.

Од вчера Управата за финансиска полиција врши проверки во Македонска навигација. Од оваа институција тие велат дека дејствуваат врз основа на извештајот што е направен.

„Според нашите надлежности, ние ќе извршиме проверки за да видиме дали има сомневања за кривични дела. Контролите ќе бидат направени во финансискиот дел, во процедурите и така натаму. Ќе постапиме според извештајот што е доставен и согласно надлежностите на Управата за финансиска полиција ќе извршиме контроли и увиди во работењето на М-НАВ“, велат од Управата за финансиска полиција.

Претседателот Стево Пендаровски денес ги прими Александар Тасевски, претседател на Струковиот синдикат на контролори на летање, и Горан Гавровски, член на синдикалниот одбор. Пендаровски ги поддржа заложбите на синдикатот за одржување на професионалното ниво во функционирањето на М-НАВ АД – Скопје, којашто е дел од критичната инфраструктура во државата. Во оваа насока, претседателот Пендаровски уште еднаш го осудил насилничкото однесување во М-НАВ од страна на вработени во таа институција и други лица кои неовластено влегле во нивните простории и повика на расчистување на случувањата во најкус можен рок, имајќи предвид дека станува збор за потенцијално загрозување на безбедноста во меѓународниот авионски сообраќај.

Од Делегацијата на ЕУ соопштија дека со загриженост ги следат настаните поврзани со националниот обезбедувач на услуги за воздушна навигација (М-НАВ). Оттаму порачаа дека клучна важност е назначувањата во компанијата за национална воздушна навигација и поврзаните услуги, како и во другите институции, да се базираат на заслуга, квалификации и искуство.

„Потсетуваме на фактот дека Северна Македонија се обврзала да го спроведува законодавството на ЕУ што се однесува на обезбедувачите на услуги за воздушна навигација (AНСПс). Ова вклучува одредби за обезбедување на независноста на АНСП од државата, обезбедува дека персоналот – особено контролорите на воздушниот сообраќај – ги исполнува законските барања за таквите позиции, и дека обезбедувањето на услугите ги почитува целите за безбедност, ефикасност во трошоците, капацитетот и околината“, соопштија од Мисијата на ЕУ во Македонија.

Оттаму со порака до институциите дека „очекуваат од државните органи брзо да ги истражат наводите за неправилностите при назначувањата во оваа компанија. Исто така очекуваат од државните органи да ги истражат извештаите за несоодветен надзор и насилство кон персоналот кој работи во M-НАВ.