Тренерот на ЦСКА Софија, Саша Илиќ вели дека неговите фудбалери нема да ја потценат екипата на Македонија ЃП на утрешниот натпревар од второто квалификациско коло за пласман во Лигата на конференции.

Поранешниот фудбалер на Партизан вели дека освен против „лавовите“ неговиот тим ќе игра против жешкото време.

– Да не се залажуваме, Македонија ЃП апсолутно не е некој наивен тим. Знам дека ни ја препишуваат фаворитската улога, но ние знаеме дека не чека тежок натпревар под тешки временски услови на кој ќе мора да одиграме максимално ако сакаме со позитивен резултат да го напуштиме Скопје. Не чека пеколно време во Скопје, со нехумани временски услови со температура од 40 степени, и тоа ќе е дополнителен проблем, но како за нас така и за нив. Добро го анализиравме противникот, гледав неколку натпревари на Македонија ЃП и е еден компактен тим со неколку одлични индивидуалци. Ние имаме проблеми со ефикасноста, ќе мора да го поправиме и тој сегмент од играта. Наша предност е што сме во натпреварувачки ритам, со почнато првенство, додека за Македонија ЃП е прв официјален меч. Како и да е, ни престојат тешки 180 минути, но верувам дека имаме сили и квалитет да се избориме за следната рунда на европската сцена – рече Илиќ.

Натпреварот меѓу Македонија ЃП и ЦСКА Софија се игра утре со почеток од 17:30 на стадионот на тренинг-центарот на ФФМ  „Петар Милошевски“ во Скопје.