Извршниот генерален секретар на Здружението на европските лиги, Алберто Коломбо, вели дека е неблагодарно да се занимаваат со прогнозите околу датумот кога ќе продолжат првенствата, но и дека иднинатата на фудбалот е пред празни трибини.

Во здружението на европски лиги се сите професионални лиги во Европа, меѓу кои се и најсилните како Премиер лигата, Ла Лига, Серија А, Бундеслкигата.

– Нема сомнеж дека фудбалот ќе се игра пред празни трибини, но никој нема одговор за тоа кога ќе почне да се игра. Владите на европските држави поединечно ќе одлучуваат кога ќе ги олабават мерките и ќе дозволат да се продолжи со спортските активности.

Засега сите сме фокусирани да се создадат услови националните лиги да се завршат ова лето. Здравјето на фудбалерите е на првото место, како и на сите останати како што се тренерите, работниците на стадионите, новинарите, лекарите – вели Коломбо.

Најблиску до продолжување на првенството е Бундеслигата каде клубовите добија дозвола од Владата да можат да тренираат доколку се почитуваат нејзините мерки, додека во Италија се очекува карантинот да биде укинат на 3. мај по што ќе може да започнат тренинзите.

Во сите европски лиги има препораки фудбалерите и тренерите да бидат изолирани во тренинг камповите и секојдневно да се вршат тестови за коронавирус.