Хелсиншкиот комитет, како една од невладините организации кои редовно го опсервираат затворскиот систем во земјава, будно го следи постапувањето на надлежните по минатонеделното, скандалозно, бегство на осудениот убиец Беким Мемети од затворско комбе на патот од затворот „Идризово“ кон болница. Оттаму очекуваат одговорност и целосно расчистување на случајот, на кој, покрај другите нивни забелешки, какви што се корупцијата и непрофесионализмот, му претходела и констатацијата дека само по неколку часови дневно има медицинска грижа за затворениците во „Идризово“. Мемети ја искористил и таа слабост на системот самоповредувајќи се надвор од неколкучасовното работно време на медицинскиот персонал поради што морал да биде префрлен во Ургeнтниот центар „Мајка Тереза“.

– Покрај корупцијата, и нестручните и неквалификувани кадри се основа на сите проблеми во затворите – вели Ина Џугуманова, правна советничка во Хелсиншки комитет за човекови права, кој заедно со македонското здружение на млади правници години наназад ги следи состојбите во затворите.

Здравствената заштита во установата, според нивниот неодамна објавениот извештај за 2022 година, се спроведува преку една докторка и две медицински сестри кои се во установата само неколку часа во текот на денот, што не е доволно за установа која брои над 1000 осудени лица со најразлични здравствени проблеми.

– За време на посетата, припадниците на затворска полиција добија дури три барања за лекарски преглед, кои во 13 часот не можеа да се спроведат бидејќи докторката ја напуштила затворската установа во 12 и 30 часот – се наведува, меѓу другото, во извештајот.

Во препораките од Комитетот, меѓу другото, се наведува и дека Министерството за здравство треба да обезбеди соодветен пристап до здравствена заштита за осудените лица.