Угледниот американски весник Волстрит џурнал по објавата за честитката која актуелниот американски претседател Доналд Трамп му ја испратил на осудениот педофил Џефри Епстин по повод неговиот 50-ти роденден во 2003 година, откри дека „најголемото име во споменарот (со желбите)“ бил Бил Клинтон.

Според извештајот, поранешниот претседател Клинтон испратил писмо, кое било вклучено во споменар што тогашната партнерка на Епстин, Гислејн Максвел, му го подарила како подарок за неговиот 50-ти роденден. Албумот наводно содржи писма од 50 важни личности.

Според Волстит џурнал, во албумот со кожен повез има страница со пасус напишан со потписот на Клинтон.

Во него, поранешниот американски претседател наводно пишува:

„Утешно е, нели, да се издржи толку долго, низ сите години учење и знаење, авантури и… (нечитлив збор). И да се има детската љубопитност, желбата да се направи разлика и (да се има) удобноста на твоите пријатели“.

Како што потсетува американскиот медиум, Клинтон бил фотографиран со Епстин и Максвел на настан во Белата куќа во 1993 година и се дружел со финансиерот и осудениот сексуален престапник од почетокот на 2000-тите.

Всушност, имало докази дека во неговата вила на Менхетен, Епстин имал закачена слика на која Клинтон е прикажан во син фустан и црвени потпетици.

Меѓу другите кои испратиле честитки до Епстин, покрај Клинтон и Трамп (кој жестоко го негира тоа), биле милијардерот од Волстрит, Леон Блек, модната дизајнерка Вера Ванг, сопственикот на медиуми Морт Цукерман, милијардерот и поранешен сопственик на „Викторијас сикрет“, Лес Векснер, адвокатот Алан Дершовиц, ловецот на модели Жан-Лук Брунел и милијардерот и поранешен извршен директор на „Мајкрософт“, Натан Марволд.

Портпаролот на Клинтон одби да го коментира извештајот и се повика на претходната изјава на поранешниот американски претседател дека Бил Клинтон ги прекинал врските со Епстин повеќе од една деценија пред неговото апсење во 2019 година и не бил свесен за неговите наводни злосторства.

Се потсетува дека „Волстрит џурнал“ открил порака за роденден испратена во име на Трамп до Епстин по повод неговиот 50-ти роденден во 2003 година. Според „Џурнал“, таа содржела контура на гола жена и отчукана порака што завршувала со фразата: „Среќен роденден – и нека секој ден биде уште една прекрасна тајна“.

Трамп одговори со поднесување тужба за клевета против медиумскиот могул Руперт Мердок, двајца новинари на „Волстрит џурнал“ и издавачките групи „Дау Џонс“ и „Њуз корп“, барајќи отштета од 10 милијарди долари.