На 12 ноември во Скопје, земјава ќе биде домаќин на најголемата регионална бизнис-конференција за е-трговија во регионот. Седма година по ред конференцијата е организирана од страна на Асоцијацијата за е-трговија на Северна Македонија, а она што особено нè радува како организатори е фактот дека се очекува да пристигнат околу 700 претприемачи од водечки светски и домашни компании – изјави Виктор Стојкоски, генерален секретар на македонската Асоцијација за е-трговија во утринската емисија „Слободен печат“.

– Кога се организира конференција од меѓународен карактер, секогаш е предизвик да се креира атрактивна агенда и при тоа да нема повторување со она што веќе било одржано претходната година од една страна. Но, од друга страна, исто толку е важно да се донесат овде најистакнатите светски имиња од оваа сфера. Досега на минатите конференции сме имале претставници од речиси сите гиганти во оваа индустрија како Фејсбук, Мета, Вибер, Алибаба … итн. Оваа година носиме најмалку три потврдени големи имиња. Едно од нив е „Опен АИ“ (OpenAI) гигант кој ние секојдневно го користиме преку алатка на вештачка интелигенција „Чет Џи-пи-ти“ , потоа „Кларна“ (Klarna), но и „ЗЕОС бај Заландо“ (ZEOS by Zalando) – изјави Стојкоски.

Како што посочи секретарот на Асоцијација за е-трговија, Стојкоски, овогодишната тема на конференцијата во Скопје ќе биде отплеткување на потенцијалот во онлајн тргувањето, односно што нуди е-трговијата и каков е нејзиниот потенцијал.

-Говорниците преку клучни говори, панел дискусии и неформални разговори ќе покажат во кои аспекти од е-трговијата е постигнат потенцијалот, и каде сè уште има простор за развиток за да може да се искористи во целост. Ќе бидат опфатени теми како испорака и логистика, нови можности за е-плаќање, маркетинг за е-трговија со користење на податоци и вештачка интелигенција, како и прекуграничен и меѓународен раст на бизнисите со е-трговија – потенцираше Стојкоски.

Стојкоски во разговорот во студиото зборуваше и за тоа кои се новите трендови во бизнисите на интернет и што е тоа што може да се имплементира тука за да имаме одржлив раст и подобрени извори на работењето со што би се подобрил растот на компаниите во Македонија и регионот.

Повеќе од разговорот со секретарот на Асоцијација за е-трговија Стојкоски можете да погледнете во видеото.