Договорот за проектот „Промовирање на стручното образование – учење преку работа“ вреден 60 милиони евра беше потпишан вчера, а неговата цел е да се зајакнат практичните вештини потребни за конкурентност на хрватскиот пазар на трудот и да се зајакне врската помеѓу образовниот систем и економските потреби, информира Пословни дневник. Министерот за економија Анте Шушњар, рече дека 60 милиони евра се наменети за учење преку работа, што значително ќе придонесе за развој на занаетчиските професии. Тој исто така рече дека во изминатиот месец се доделени стипендии за занаетчиски професии кои се дефицитарни.

„Владата и Министерството за економија враќаат програма која не е активна повеќе од пет години, тоа беше моја лична мисија“, рече Шушњар, додавајќи дека сака што поскоро да ја врати програмата на пазарот на трудот.

Тој нагласи дека една од целите е да се намали увозот на работници, бидејќи намерата на владата е да ги насочи децата кон образование за занаети, со цел подобро да ги задоволат потребите на пазарот на трудот. Според него, ова е нова фаза во стручното образование во Хрватска. Тој верува дека договорот ќе придонесе и за зајакнување на врските меѓу образованието и економијата. 56 милиони евра се наменети за охрабрување на економските субјекти кои ќе ја спроведат програмата, а еден милион евра се наменети за обука на ментори кои ќе ги учат учениците.