Најголемиот прилив на странски инвестиции во Босна и Херцеговина во 2024 година доаѓа од Хрватска и претставува речиси една четвртина од вкупната вредност, објави Централната банка на Босна и Херцеговина, пренесува Индекс.

Минатата година, Хрватите инвестирале во БиХ 211,7 милиони евра, по што следува Германија, од која странските инвестиции изнесуваа околу 130,3 милиони евра. Словенечките инвестиции се на трето место и изнесуваа 126,9 милиони евра.

Во 2024 година, странските директни инвестиции изнесуваа помалку од претходната 2023 година.

Според податоците од Централната банка на БиХ, минатата година најмногу инвестиции беа насочени кон областа на финансиските услуги, кои привлекоа 257,6 милиони евра. Потоа следуваат малопродажбата со 112,6 милиони евра и големопродажбата со 104,6 милиони евра.

Во 2024 година, директните странски инвестиции во Босна и Херцеговина изнесуваа околу 899,5 милиони евра, додека во 2023 година изнесуваа 1,05 милијарди евра.

Централната банка на Босна и Херцеговина наведува дека од водењето статистика до крајот на 2024 година, вкупната состојба на странски директни инвестиции во таа земја изнесувала 10,83 милијарди евра, а најголем дел се однесува на Хрватска, со 1,64 милијарди евра, што е 15,2 проценти од вкупните странски инвестиции.