Европската комисија ја исплати шестата транша од Механизмот за закрепнување и отпорност на Хрватска, во износ од 835,6 милиони евра, пренесе „Пословни дневник“.

„Реформите и инвестициите поврзани со оваа исплата ќе доведат до позитивни промени за хрватските граѓани и бизниси, особено во областите на здравството, борбата против корупцијата, истражувањето на геотермална енергија и развојот на водород, управувањето со водните ресурси, отпорноста на природни катастрофи, електричните мрежи на островите и енергетската безбедност“, се вели во соопштението на Комисијата.

Оваа исплата опфаќа 26 клучни пресвртници и цели, кои Комисијата ги оцени како исполнети.

Вкупните средства исплатени на Хрватска во рамките на Механизмот за закрепнување и отпорност сега изнесуваат 5,3 милијарди евра, што е околу 53 проценти од вкупните доделени средства, вклучувајќи ги и првичните средства доделени по усвојувањето на планот. Хрватскиот план за закрепнување и отпорност е финансиран од грантови и заеми во вкупен износ од 10 милијарди евра.

Хрватска испрати барање за исплата на шестата транша на 20 декември минатата година, но потоа побара одложување од осум недели бидејќи не е усвоена законската рамка што треба да ја редефинира и подобри работата на државните компании, пренесува Пословни дневник.