Во Хрватска, во првата половина на 2024 година, објавени се повеќе од 174.000 огласи за вработување, или за 2,1 отсто помалку од истиот период во 2023 година. Според објавените огласи се гледа дека има пад на побарувачката на работници во туризмот и угостителството, продажбата и производството, покажува анализата на порталот Mојпосао, пишува Н1.хр.

Станува збор за полугодишна анализа на хрватскиот пазар на труд што ја спроведува компанијата „Алма Карер Кроација“, која стои зад порталот Мојпосао.

Анализата покажува дека најголем пад на побарувачката за работници, од 15 отсто во однос на лани, има во категоријата дизајн и уметност, додека во туризмот падот е 12 отсто. Според професиите, и покрај падот на побарувачката или помалиот број огласи во првата половина од годинава за овие дејности, најбарани беа продавачите и трговците, келнерите и шанкерите, готвачите, магационерите и возачите.

Растот на бројот на огласи за негуватели за деца и стари лица е најголем, за 28 отсто е поголем во однос на првата половина од минатата година, а побарувачката за работници за маркетинг, ПР и медиумски работници се зголемила за 22 отсто. Се бараат и архитекти, при што бројот на ваквите огласи е зголемен за цели 22 отсто, а хрватската економија има потреба и од вработени во секторот за човечки ресурси.

Иако по неколку години раст во првата половина од оваа 2024 година имаше благ пад на побарувачката за работници на хрватскиот пазар на труд, порталот Мојпосао го означува фактот дека бројот на странски работници во Хрватска продолжи да расте, што се случува непрекинато неколку години.

Ова, велат, е во согласност со прогнозите дека ќе продолжи бранот пристигнувања на работници од странство и ќе се зголеми бројот на издадени работни дозволи.

„Со оглед на тоа што процесот на ангажирање странци најчесто се спроведува преку специјализирани агенции за увоз на странска работна сила, како и моменталните услови на домашниот пазар на труд, сметаме дека реалната побарувачка за работна сила е зголемена за околу три отсто во споредба со минатата година“, коментира директорот на „Алма Кареер Кроација“, Игор Жоња.

Поголемиот дел од работните места сè уште се нудат во Загреб и неговата околина, а постојаното вработување исто така порасна за четири проценти. Како и претходните години, така и во првата половина од оваа година, најмногу работни места или 55 отсто од вкупно објавените огласи се понудени во Загреб и Загребската жупанија. Следат крајбрежните жупании – Сплит-Далмација со 17 отсто од вкупните огласи за вработување, Приморје-Горски Котар со 14 и Истра со 11 отсто од овие огласи.

Растот на вработеноста на неопределена или трајна основа продолжи, за четири отсто во однос на 2023 година, бидејќи работодавците тоа го понудиле на дури 80 отсто од огласите за вработување во првите шест месеци од 2024 година. Од друга страна, за четири отсто се намалил бројот на огласи за работа на определено време.

На седум отсто од огласите се барале вработени за сезонска работа, додека на објавените огласи се барале студенти. Жоња оценува дека пазарот на трудот во моментов е исклучително поволен за оние кои бараат работа и дека ова ги охрабрува работодавачите да понудат трајно вработување со цел да привлечат и задржат квалитетни работници.

„Зголемениот обрт на вработените, заедно со високите очекувања на новите генерации кои бараат стабилност и сигурност, дополнително ги мотивира работодавачите на оваа практика. Постои и можност за работа од далечина за странски компании, што дополнително ги проширува опциите за таленти и ги мотивира работодавците да понудат поатрактивни услови за да останат конкурентни на пазарот“, вели Жоња.

Како заклучок, тој вели дека работодавците сè повеќе ја препознаваат важноста на сеопфатната грижа за вработените, вклучувајќи конкурентни придобивки, слушање на потребите, обезбедување можности за професионален развој, но и флексибилност во работата и поддршка на рамнотежата помеѓу работата и приватниот живот како неопходна за лојалноста на вработените.