Пред еден месец во германскиот град Хајлброн исчезна 43-годишниот Фрањо Сабо од Хрватска. Неговото семејство со недели живееше во страв и неизвесност, обидувајќи се да открие каде исчезнал Фрањо, само неколку дена по пристигнувањето во Германија, каде отишол на привремена работа.

Според блиските на човекот, тој пристигнал во Германија за првпат, без познавање на јазикот, без пари и без основна писменост. Тој дошол во Хајлброн по препорака на познаник кој претходно работел за човек по име Бранислав К., за кого семејството претпоставува дека раководи со агенција за регрутирање на работници за логистички гигант ДХЛ.

Според семејството, Фрањо работел само три дена, по што Бранислав К. им рекол дека „го испратил дома со автобус“. Но, Фрањо никогаш не пристигнал во Хрватска. Семејството се обидело да добие дополнителни информации, но тврди дека работодавачот ги избегнувал, ги навредувал, ги блокирал и не одговарал на нивните прашања. Тие го пријавиле исчезнувањето на хрватската и германската полиција. За време на истрагата се појавија непотврдени информации дека Фрањо бил виден во Карлсруе, но семејството до вчера не знаело ништо потврдено за неговата судбина.

Пресвртот се случил кога германската полиција го информирала семејството дека Фрањо е пронајден во едно од засолништата за бегалци во Германија, без да ја открие неговата точна локација. Полицијата потврдила дека тој е жив и дека самиот изразил желба да остане во Германија и да не се враќа во Хрватска.

Тој, според германските истражни органи, не сакал да комуницира со семејството. Исчезнувањето на Фрањо Сабо, како и неговата одлука да остане во Германија и покрај тешките услови, сè уште отвораат многу прашања, пишува „Вечерњи лист“.

Семејството е сè уште збунето и загрижено и истакнува дека Фрањо никогаш немал никакви проблеми. Блиските на Хрватот и натаму ги повикуваат сите што имаат каква било информација за Сабо, да ги контактираат или да ги споделат информациите со полицијата.