Екипата на Еурофарм Пелистер во новата сезона влегува со големи амбиции, да го симне Вардар од тронот во македонскиот ракомет и за таа цел направи голем ремонт на екипата притоа за прв пат носејќи ракометари од Франција и од Тунис.

Руди Сери е првиот француски ракометар што ќе игра за Е. Пелистер, а Усама Хосни ќе биде првиот Тунижанец што го облече дресот на македонскиот вицешампион.

Хосни кој игра на позицијата десет бек, во Битола доаѓа од францускиот шампионат каде во изминатите три години настапуваше за екипата на Истр.

– Ова е убаво искуство за мене. Можноста да дојдам во Македонија и да бидам прв ракометар од Тунис во Еурофарм Пелистер ми ја понуди мојот агент. Тој ми го претстави клубот и амбициите, можноста да се остварат добри резултати во Европа и да се освои македонското првенство. Ова е убава шанса за мене, тотално различно искуство од Франција, каде што играв. Оптимист сум и мотивиран сум за мојот нов предизвик. Наидов на амбициозна група ракометари. Важно е да се бориме за титулата во Македонија. Го гледав последниот натпревар против директниот конкурент Вардар 1961 минатата сезона. За жал заради мали детали Еурофарм Пелистер ја загуби титулата. Но, оптимист сум дека годинава ќе биде подобро – вели Хосни.

Бекот кој со репрезентацијата на Тунис триумфира во Купот на Африка 2018 година, а две години подоцна загуби во финалето, добро знае за ракометната традиција во Македонија и на Балканот.

– Ракометот има традиција на Балканот. Македонија има добра репрезентација, во 2015 година игравме важен натпревар во Полска за олимписките квалификации. Бев најдобар играч на тој натпревар, победивме и благодарение на тој натпревар, Тунис се квалификува за Олимписките Игри во Рио. Традиција е да излегуваат добри ракометари од Македонија, да имате добра селекција. Убав пример за тоа е Кирил Лазаров – додава Хосни.

Е. Пелистер во новата сезона освен во домашните Суперлига и Куп, ќе се натпреварува и во СЕГА лигата и ќе игра во групната фаза во Лигата на Европа.