Деветмесечното девојче Jулија беше смртно нападнато од питбул во областа Ацера, во близина на Неапол, Италија.

Кучето кое им припаѓа на родителите на бебето ја нападнало Јулија додека таа спиела во својот кревет.

Кога ја однеле во болница, лекарите едноставно констатирале смрт. Девојчето е каснато по лицето и главата.

Првично, 25-годишниот татко, кој е шанкер, изјави дека неговата ќерка била нападната од куче скитник. Но, по лутата реакција на неговата партнерка, која во тоа време работела во пицерија, таткото бил принуден да ја каже вистината.

Додека сведочеше пред обвинителите, рече дека заспал и не можел да го спречи фаталниот напад на кучето врз неговото дете.

Соседите изјавиле дека станува збор за агресивно куче. Минатото лето, питбулот побегнал и нападнал мало куче кое било однесено на прошетка.

„Рековме дека мора да го заклучат бидејќи е опасно“, изјавија локалните жители за АНСА, додавајќи „дека двајцата млади родители не разбираат колку е опасно животното“.

„Родителите на Јулија се добри луѓе, но тие веројатно не сфатија во каква опасност се наоѓа нивната ќерка“, им рекол соседот на новинарите.

Локалното обвинителство започна истрага за инцидентот и нареди обдукција.

Минатата година, во Камполонго, Салерно, 13-месечно бебе го загуби животот кога во дворот беше убиено од два питбула на сосед. Во друг инцидент, питбул уби петмесечно бебе додека беше во прегратките на баба му.