Холивудските актери најавија дека ќе се приклучат на тековниот штрајк на сценаристите, во најголемото затворање на филмската индустрија по повеќе од 60 години, пренесува „Би-би-си“.

Здружението на актери „САГ“(„SAG“) сака стриминг-гигантите да се согласат на поправедна поделба на профитот и подобри услови за работа. Па, поради тоа најавија дека ќе престанат со работа на полноќ.

Во моментот кога беше прогласен штрајкот, холивудските ѕвезди Килијан Марфи, Мет Дејмон и Емили Блант ја напуштија премиерата на долгоочекуваниот филм „Опенхајмер“ на Кристофер Нолан во Лондон во четвртокот вечерта.

Говорејќи на сцената во Одеон Лукс, режисерот Кристофер Нолан се заблагодарил за неверојатната актерска екипа, предводена од Килијан Марфи и додал дека тие морале да ја напуштат сцената.

„За жал, тие треба да заминат да ги напишат своите натписи за она што ние веруваме дека е неизбежен штрајк на Синдикатот на актери, приклучувајќи се на Здружението на писатели, во борбата за правични плати за вработените членови на нивниот синдикат„ додал Нолан.

Штрајкот ќе започне во петок наутро и ќе се одржи пред седиштето на компанијата „Нетфликс“ во Калифорнија, а потоа ќе продолжи и пред „Парамаунт“, “Ворнер Брос“ и „Дизни“.

Синдикатот на актерите, исто така сака гаранција дека вештачката интелигенција и компјутерски генерираните лица и гласови нема да се користат за замена на актерите.

Штрајкот на холивудските сценаристи започна во мај, а сега на групата од 11.500 членови на Здружението на сценаристи на Америка ќе се придружат околу 160.000 членови на Синдикатот на актери.

Се очекува истовремените штрајкови да го запрат најголемиот дел од холивудските филмски и ТВ-продукции и да имаат големо влијание врз пошироката економија во Лос Анџелес.

Со приклучувањето на некои од најголемите холивудски ѕвезди на штрајкот, прес-конференциите за летните и есенските филмски премиери ќе бидат откажани, а доделувањето на наградите „Еми“ можеби ќе биде одложено. Работниците низ Лос Анџелес се подготвуваат за недели и месеци без плата.