Имавме три состаноци на кои присуствуваа и правници и немаше шанса да се прифати барањето за полагање на два предмети од државната матура за оваа година, вели за „Слободен печат“ Бленди Ходаи, лидерот на Средношколскиот сојуз, во врска со бројните реакции од другите средношколски организации за постигнатиот договор за државна матура.

Средношколски глас и Средношколски фронт изразија разочараност од договорот, бидејќи според нив основното барање за полагање два наместо четири предмети од државната матура не е исполнето, а Бленди вели оти и без разлика на тоа што и Сојузот првично излезе со тоа барање, сепак тоа нема да им е од полза на матурантите кои сакаат да се запишат на факултет надвор од државата.

– И амбасадорот на Словенија се вклучи во овие дебати, бидејќи најмногу ученици од кај нас се запишуваат на факултети таму. Амбасадорот Милан вели оти нема шанси Универзитетите во Марибор, Нова Горица или Купер да дозволат студент да запише факултет со два предмети матура – вели Ходаи кој потоа посочи кои биле понатамошните опции кои им биле понудени на матурантите.

– Поради тоа што неможеше да имаме само два предмети имавме опција да бираме помеѓу полагање на 2 екстерни плус два интерни предмети со 10 прифатени наши барања или три екстерни плус еден интерен – објаснува Ходаи.

Лидерот на Сојузот вели и дека ако останатите средношколски организации се во можност да се изборат за полагање на два предмети, тогаш слободно можат да го сторат тоа.

– Само во Скопје има 84 ученици што се прифатени во престижни Универзитети во Германија, Австрија и Франција и ниту еден од нив не треба да биде оштетен, а доколку средношколски глас и средношколски фронт можат да постигнат нешто повеќе тогаш нека го направат тоа – порачува Ходаи.