Јужнокорејскиот автомобилски гигант „Хјундаи“ се соочува со судска постапка поради обвинувањата дека не ги предупредил своите клиенти дека еден од најпопуларните електрични модели може да биде украден „без напор, за неколку секунди“, пренесе „Гардијан“.

Елиот Инграм, експерт за дигитална безбедност, останал запрепастен кога надзорната камера инсталирана во неговиот дом снимила крадец со качулки како му го краде автомобилот „Ионик 5“ за помалку од 20 секунди.

Се верува дека крадецот користел уред достапен на интернет, кој го имитира електронскиот клуч од автомобилот.

Тоа е последната во серијата кражби на возила, при што многу сопственици сега прибегнуваат кон заклучување на воланот.

Автомобилот на Инграм подоцна бил пронајден од полицијата, но тој го раскинал договорот и побарал отштета од компанијата. Според него, јужнокорејскиот автомобилски гигант требало да ги предупреди клиентите за безбедносните пропусти.