Жителите на реканското село Жировница се закануваат дека ќе ја спречат изградбата на две мали хидроцентрали на Жировничка Река, за кои Владата пред Нова година го продолжи договорот со концесионерот „Хидроген енерџи груп“, а деновиве се потпишуваат анексите на договорите.

Станува збор за две мали хидроцентрали над селото Жировница, познати како Жировница 5 и 6, на кои пред две години Општина Маврово Ростуше им ја укина дозволата за градба по бурните реакции на локалното население, кои протестираа поради опасноста селото да остане без вода за пиење.

– Ставот на нашето население е непроменет уште од 2019 година – ние сме против изградбата на хидроцентралите на реката што поминува низ нашето село и нема да дозволиме тие да се изградат – вели Аднан Салиу, претседател на месната заедница во селото Жировница.

Жителите на ова реканско село тогаш се спротивставија на изградбата, а беа поддржани и од граѓански здруженија за заштита на животната средина.

Концесиските договори се продолжени откако Комисијата за надзор на Министерството за животна средина дала мислење дека концесионерот не бил во можност за започне со градежни активности поради, како што се наведува, попречувањето од населението, а потоа одобренијата за градба на двете мали ХЕЦ се поништени од Општина Маврово-Ростуше поради истечен рок за градба. Ова е вторпат откако во 2015 година ги доби двете концесии на „Хидроген енерџи груп“ да му се продолжуваат концесиските договори за изградба на хидроцентрали на Жировничка Река.

Во програмата на Владата е наведено дека нема да се издаваат дозволи за нови мали хидроцентрали во заштитените подрачја. Дел од локациите на жировничките хидроцентрали се сместени токму во зона на строга заштита во рамките на Националниот парк Маврово.

Спомнувајќи го токму случајот со малите хидроцентрали во Жировница, премиерот Зоран Заев во февруари годинава на прес-конференција рече дека локацијата на хидроцентралите е пред селото, пред системите за водоснабдување и дека тоа може да создаде проблем.

– Никој нема проблем да бидат после селото, на истекот на реката. Но, некој да не ја утврдил потребата дека тоа го загрозува водоснабдувањето на селото Жировница, навистина е проблем. Самите податоци веројатно ќе донесат причини пред Владата да понесеме буџетски реперкусии, да плати казни за раскин на договорите, но нема поважно од здравјето на граѓаните – изјави тогаш Заев.

– Ние му објаснивме на премиерот дека постои незадоволство кај локалното население и дека ние стоиме зад она што го бара народот, и тој потоа ја даде таа изјава. Но, ние работиме според закон и не можеме да одбиеме некого ако нема правен основ за тоа – вели Медат Куртовски, градоначалник на Општина Маврово-Ростуше.

До Општината која е надлежна да издаде градежна дозвола за изградба на хидроцентралите, сè уште не стасало никакво известување за продолжување на концесиските договори.

„Хидроген енерџи груп“ е фирма формирана од конзорциум од две компании: „Хидроенерџи груп“ и „Фероивест“, во која еден од сопствениците е Кочо Анѓушев.

– Сега сме во фаза на подготовка на документацијата, а потоа ќе аплицираме за издавање одобренијата за градба во Општината – вели Невенка Таврајковска, надлежна за проектот на жировничките хидроцентрали на концесионерот „Хидроген енерџи груп“.