Вистинската причина за откажувањето на посетата на израелскиот претседател Исак Херцог на Азербејџан во рамки на самитот на ОН е затворањето на турскиот воздушен простор за неговиот авион да прелета, пишува денеска израелскиот весник Једиот Ахронот.

Кабинетот на израелскиот претседател во вчеравечер соопшти дека Херцог ја откажал планираната посета на Баку, главниот град на Азербејџан, од „безбедносни причини“.

Сепак, според весникот, извори на азербејџанското Министерство за надворешни работи објавиле дека вистинската причина е што Турција не дозволила израелскиот претседателски авион „Зион винг“ да помине низ нејзиниот воздушен простор.

„За жал, неколкудневните интензивни преговори по дипломатски канали не дадоа резултат. Азербејџан обезбеди поволни услови за учество на сите страни на конференцијата, но ситуацијата околу посетата на израелскиот претседател настана од причини надвор од контрола на нашата земја “, се вели во соопштението на азербејџанските власти, пренесува турскиот весник „Милиџет“.

Според израелскиот весник, извори од азербејџанското МНР изјавиле дека вистинската причина за одбивањето на Турција да дозволи минување на израелскиот претседателски авион преку нејзиниот воздушен простор е тоа што „Турција ги прекина односите со Израел и не презема никакви чекори за нивно развивање во иднината“, како што рече турскиот претседател Реџеп Таип Ердоган. Турскиот лидер исто така повика на зголемен дипломатски притисок врз Израел.