Во прелиминарниот извештај на иранската армија пишува дека досега не се пронајдени докази за убиство или напад во хеликоптерската несреќа во која загина претседателот Ебрахим Раиси, објавија државните медиуми.

-Знаци кои укажуваат на пукање или нешто слично не се забележани во остатоците од хеликоптерот којсе урна во област на висока надморска височина и се запали – се вели во извештајот објавен од Генералштабот на вооружените сили.

-Ништо сомнително не е забележано во разговорите на контролната кула со екипажот на летот – се додава.

Повеќе детали ќе бидат објавени додека истрагата продолжува, се вели во извештајот.

Раиси беше погребан во шиитскиот муслимански свет град Машад во четвртокот, четири дена по несреќата во која загинаа и министерот за надворешни работи Хосеин Амирабдолахиан и шест други.

Експертите велат дека Иран има лоши безбедносни мерки во воздушниот сообраќај и дека несреќите се чести, од кои многу се вклучени авиони од американско производство купени пред исламската револуција во 1979 година.

Техеран вели дека поради американските санкции, долго време не може да купи нови авиони или резервни делови од Запад.