Директорот на Бирото за развој на образование (БРО) Зеќирија Хасипи не чувствува одговорност за доцнењето на учебниците.

Дел од учениците ги добија учебниците неколку недели пред крајот на оваа учебна година. За тоа дали учебниците ќе доцнат и во новата учебна година, Хасипи изјави дека за изработка на наставни програми има процедури и правилници и според тие процедури од Бирото постапиле навремено.

-Откако се подготвија работните групи, повторно ангажиравме второстепена комисија за разгледување евентуални пропусти. По изработка на конечната верзја беше испратена до Министерството за образование и наука. Мислам дека средина на март ги доставивме програмите. Ако постапката за печатење за учебници оди по сите прописи, мислам дека во септември ќе има учебници, рече Хасипи.

И министерот Јетон Шаќири уверува дека се прават напори за навремено доставување на учебниците. Прашан зошто се доцни со изготвувањето на програмите за шесто одделение, Шаќири истакна дека се доставени навреме, во март, а некои од предметите и во април.

-Но, исто така некои од наставните програми за трето одделение се доставени во ноември минатата година. За трето одделение сме во напредна фаза, а за шесто ќе се обидеме да го стигнеме 1 септември. Се прават сите подготовки на 1 септември навремено да бидат доставени учебниците. Што се однесува до предметот географија за седмо и за деветто одделение мислам дека системот веќе се отвори и за сите предмети кои ќе имаат барања од страна на училиштата ние ќе доставиме учебници, рече Шаќири.

Министерот соопшти дека во тек е крупна реформа во основното образование, каде етапно се изработуваат нови наставни програми, нови учебници по сите предмети. Посочи дека интегрираат предмети за, како што рече, да можат учениците полесно и преку повеќе аспекти да ја совладуваат нивната материја.