Несекојдневна сцена се случи на летот од Милано кон Лондон на авиокомпанијата „Рајанер“, кога двајца патници предизвикаа паника меѓу патниците и екипажот откако почнаа да ги уништуваат сопствените пасоши, пренесоа странските медиуми.

Инцидентот се случил околу 20 минути по полетувањето, кога се изгасил знакот за задолжително врзување на појасите. Еден од мажите почнал да кине страници од својот пасош и да ги голта, додека неговиот сопатник се затворил во тоалетот обидувајќи се да ја фрли патната исправа во веце школката.

Ситуацијата предизвикала голема вознемиреност кај патниците, а стјуардесите безуспешно се обидувале да го смират патникот што одбивал да излезе од тоалетот. Атмосферата во авионот станала уште понатегната по јавното соопштение на екипажот заради безбедносни причини.

Поради сомнителното однесување и можен ризик, пилотот донел одлука авионот да биде пренасочен кон Париз. По безбедното слетување, во авионот влегла француската полиција и ги уапсила двајцата мажи, а целиот процес на проверка на патниците и багажот траел околу два часа.

По завршувањето на контролата, летот продолжил кон Лондон. Еден од патниците истакнал дека и покрај вознемирувачката ситуација, екипажот останал смирен и професионален, нагласувајќи дека „авиокомпанијата извонредно се справила со настанот“.