На Украина ќе и треба план за реконструкција по војната со Русија, сличен на оној што САД ѝ го понудија на Европа по Втората светска војна, изјави во средата европскиот комесар за буџет, Јоханес Хан.

Според американската шема по Втората светска војна позната како Маршалов план, Соединетите Држави ѝ доделија на Европа денешен еквивалент од околу 200 милијарди американски долари за четири години како економска и техничка помош, потсетува Ројтерс.

„Мислам дека она што ни треба за Украина, на крајот на денот, е ажуриран модел на Маршаловиот план“, рече Хан на брифингот со новинарите.

Хан рече дека тоа ќе и помогне на Украина да закрепне брзо, наместо со децении, од масовното уништување од страна на руската армија и ќе доведе до побрза конвергенција на Украина со Европската унија.

Киев се пријави да стане формален кандидат за приклучување на блокот. Дури и во време на мир тој процес е долг, а е речиси невозможен поради војната што беснее во земјата.

Хан не даде никаква проценка за тоа колку пари би можеле да бидат потребни, но рече дека напорите за обнова на Украина не може да ги преземе само Европа и дека веројатно земјите од Г-20 ќе мора да учествуваат, вклучително и Русија.

Хан повтори дека засега ЕУ не планира да започне друга заедничка шема за задолжување за справување со економските и социјалните последици за блокот од војната во Украина.