Палестинската милитантна група Хамас во понеделник соопшти дека не добила план за прекин на огнот за Појасот Газа предложен од американскиот претседател Доналд Трамп, откако израелските медиуми објавија дека групата го прифатила предлогот.

„На Хамас не му е презентиран никаков план“, изјави за Ројтерс функционер на Хамас, зборувајќи под услов на анонимност.

Израелскиот весник „Хаарец“ претходно објави, повикувајќи се на неименувани извори, дека Хамас во принцип се согласил да ги ослободи сите израелски заложници што ги држи во замена за стотици палестински затвореници и постепено повлекување на израелските трупи според планот на Трамп, објави Ројтерс.

Предлогот, како што се вели, исто така повикува на крај на владеењето на Хамас во Газа, како и на тоа Израел да се согласи да не ја анектира територијата или да ги протера Палестинците што живеат таму.

Трамп претходно им кажа на новинарите дека Израел и Хамас се блиску до постигнување „некаков договор“ за потенцијално прекин на огнот, но не даде детали. Израел сè уште јавно не одговорил на коментарите на Трамп.

Американскиот претседател треба да се сретне во понеделник со израелскиот премиер Бенјамин Нетанјаху, кој ја предводи крајно десничарската владејачка коалиција која се противи на прекинување на војната во Газа сè додека Хамас не биде уништен.

Специјалниот претставник на Трамп, Стив Виткоф, изјави дека оваа недела им презентирал предлози на лидерите на неколку земји со муслиманско мнозинство, кои вклучуваат мировен план од 21 точка за Блискиот Исток.

Како што објави вчера Си-ен-ен, повикувајќи се на извори, мировниот план предвидува сите заложници да бидат ослободени во рок од 48 часа од постигнувањето договор, во замена за постепено повлекување на израелските сили од Газа.

Според изворот, арапските лидери генерално го поддржуваат предлогот, иако не го сметаат за совршен и сакаат конфликтот да заврши што е можно поскоро. Како што е објавено, оваа верзија на планот не дава временска рамка за повлекување на израелските сили, но конкретно нагласува дека Израел нема повторно да го нападне Катар. Исто така, наведува дека не може да има присилно раселување од Газа.

Планот, според изворот, предвидува дека Хамас нема да има никаква идна улога во управувањето со Газа и предвидува две нивоа на привремена администрација: меѓународно надзорно тело и палестински комитет. Како што споменавме, нема временска рамка за пренос на власта од привремената администрација на Палестинската самоуправа.

Предлогот предвидува улога на ОН во обезбедувањето хуманитарна помош и не го споменува Хуманитарниот фонд за Газа.

Планот не наведува дека САД ќе поддржат палестинска држава, туку признава дека тоа е аспирација на Палестинците.