Хамас објави пропагандно видео од двајца заложници во Газа, меѓу кои е и српскиот државјанин Алон Охел (22), кој е држен во заробеништво речиси две години, јавува Нова.рс.

Видеото прво го прикажува израелскиот заложник Гај Гилбоа-Далал како вози низ градот и вели дека е киднапиран 22 месеци, додека камерата ги прикажува уништените згради.

На крајот му се придружува Алон Охел, а двајцата се прегрнуваат и, видливо изненадени, повторуваат како не можат да поверуваат дека повторно се гледаат.

Тоа е ретко видео од заложниците на Хамас, кое ги прикажува над земја.

Видеото наводно е снимено на 28 август и објавено точно на 700-тиот ден од војната, во време кога низ Израел се одржуваат протести со кои се бара договор за прекин на огнот и ослободување на заложниците.

Според израелските медиуми, семејството на Алон Охел потврдило дека тој е на видеото, но не дало дозвола медиумите да го објават видеото.

Ова е прв пат да се објави видео на кое се гледа Алон Охел во заробеништво. Неговото семејство претходно добило само еден знак дека е жив – за време на прекинот на огнот во февруари, кога ослободените заложници рекле дека се држат со него. Потоа неговата мајка рекла дека ѝ било кажано како нејзиниот син бил врзан во тунел на Хамас, гладен и имал неколку нелекувани повреди, пишува „Тајмс оф Израел“.