Гувернерот на американската држава Калифорнија, Гевин Њусом, поднесе тужба против телевизиската мрежа „Фокс њуз“, обвинувајќи ја за клевета поради тоа што објавила дека лажел за телефонскиот разговор со претседателот на Соединетите Американски Држави, Доналд Трамп.

Тужбата е поднесена во сојузната држава Делавер, каде што е регистриран „Фокс њуз“, а Њусом бара отштета од најмалку 787 милиони долари, како и судска забрана за емитување содржини што, според неговите тврдења, погрешно ги претставуваат настаните, објавува „Њујорк тајмс“.

Спорот избувна откако Трамп на 10 јуни изјави дека разговарал со Њусом претходниот ден, додека гувернерот подоцна објави дека немало таков повик „тој ден“ и ја предупреди јавноста за неодговорното однесување на претседателот.