Гувернерот на Калифорнија, Гевин Њусом, денес изјави дека американскиот претседател Доналд Трамп планира да остане на власт и по 2028 година, кршејќи го Уставот и користејќи ја федералната полиција за манипулирање на изборите за своја корист и за корист на неговите сојузници.

„Американската демократија е на работ на авторитаризам, додека Трамп го заменува владеењето на правото со „владеењето на Дон“.

Иако 22-от амандман на американскиот Устав забранува повеќе од два претседателски мандати, Трамп, како што тврди гувернерот на Калифорнија, отворено покажа интерес за трет мандат.

„Мислите дека се шегува за 2028 година? Мислите дека кога ги доведува странските лидери во Овалната соба и оди во продавницата на Белата куќа… и им покажува капи од 2028 година, не е сериозен? Разбудете се… Ако нападот на Трамп врз демократијата не се запре, ќе ја изгубите вашата земја“, предупреди тој.

Њусом, кој се смета за потенцијален кандидат за претседател на демократите во 2028 година, рече дека за време на состанокот со американскиот претседател во февруари во Овалната соба, Трамп покажал слика од Франклин Д. Рузвелт, единствениот американски претседател кој отслужил четири мандати.

Тој предупреди за можно „мешање од страна на федералните агенти во изборниот процес“ и додаде дека се плаши дека Трамп ќе испрати федерални трупи на гласачките места за да ги заплаши гласачите и да влијае на резултатите од изборите.