Ако некаде треба да се размислува за кадровско екипирање и материјално техничко опремување, тоа треба да е токму Државната антикорупцкиска комисија, дури на истата да ѝ се дадат некои извршни надлежности, односно таа да може да поднесува кривични пријави, а не како досега, само да известува.

Ова е експертското мислење како коментар на информацијата што ја објави вицепремиерот за борба против корупцијата Љупчо Николовски дека на оглас бара луѓе за борба против ова општествено зло. За сузбивање на криминалот на Николовски му требаат десет нови професионалци.

Николовски смета дека идните членови на тимот ќе помогнат во креирањето и реализацијата на системски мерки за спречување и искоренување на корупцијата.

„Нашата цел е да го вклопиме искусниот кадар со нови, прогресивни, енергични и високоедуцирани млади луѓе кои се подготвени несебично да придонесат во создавањето коренити промени во македонското општествено дејствување“, напиша Николовски на Фејсбук.

Тој ги повика професионалците кои имаат желба и знаење да придонесат во борбата против корупцијата и да се пријават на огласот. Истовремено, вицепремиерот ветува дека вработувањето ќе биде преку транспарентна и правична селекција.

За намерата  на Николовски да ја зајакнува оваа инстиутција, поранешниот висок полициски старешина и магистер по безбедносни науки, Љубомир Ѓурчевски, за „Слободен печат“ вели дека нема таква потреба, бидејќи државата веќе има такви институции.

– Ниту има потреба, ниту законски основ, затоа што за борбата против корупцијта надлежно е Јавното обвинителство и сите други органи од извршната власт – полиција, финансиска полиција, царинска управа, УЈП и сите инспекциски служби. Сите овие органи со Устав и со закон се обврзани да прибираат докази за откривање и докажување на криминалот и да ги достават до Јавното обвинителство кое ги преточува во обвинителни акти – вели Ѓурчевски.

Ѓурчевски се сомнева дека со неговото нестручно работење, Николовски ќе направи само штета на истрагите, зашто „сака да биде главен и на царина, на полиција, всушност сака да создаде квази-органи преку кои директно ќе учествува во активностите на овие органи“.

– Апсурдно беше и самото именување на министер за борба против корупцијата со сите овие органи и со целокупната законска регулатива како е регулирано тоа кривично дело – додаде Ѓурчевски.