Германскиот фудбалер Илкај Гундоган по една година помината во Барселона се врати во Манчестер сити, а во интервју за британските медиуми откри како се случи тоа.

Играчот за врска се осврна на времето поминато во Барселона:

– Во Барселона си поминав одлично. Настрана сето тоа, играв за еден од најголемите клубови во светот. Исполнив еден од моите детски соништа: да го носам грбот на Барса на градите. Можеби кога луѓето ја гледаат таа сезона мислат дека е неуспешна, бидејќи не освоивме трофеи, и од таа гледна точка, тоа е точно. Но, ако погледнете како игравме, освоивме 85 бода, само три помалку од претходната година кога клубот ја освои титулата. А за ривал имавме многу силен Реал – изјави Гундоган.

Германецот помина седум години во Сити пред да замине во Барселона.

– За мене беше привилегија да играм за Барселона. Можеби сѐ ќе беше поинаку да имаше други околности. Тешко искуство, но фантастично во исто време. Не жалам за ништо – се зборовите на Гундоган.

А како дојде до враќањето во Манчестер – на многу интересен начин.

– Кога бев сигурен дека враќањето во Сити ќе биде најдобрата опција за мене, го повикав Гвардиола. Бев многу нервозен пред тој повик, но сѐ помина одлично. Мојот однос со Пеп отсекогаш беше добар, но никогаш не можеш да знаеш каква е ситуацијата, како некој друг ќе реагира – истакна Гундоган.